Chin arsi tleu pakhat a Ṭil leh ta

Myanmar ramhuap ih hminthang hlasakthiam le hlaphuahthiam Lumbang khuami Chin arsi Salai John Tin Zam (kum 70) cun August 22, zaanlam nazi 5 hrawngah tulai damlonak thawn in cem san tiah kan thei.

Mai Sokhlei Par nganmi Salai John Tin Zam ih thu tawi

U John hi 1980 hrawng ihsin a phuah mi le a sak mi hla pawl rampum huapin a rak lar thok ih, tuisunni tiang mipi tampiin an uar mi le upat mi artist a si. Kan miphun lakah rampi hngorban ih hminthang artist malte lawng kan nei hrih; cupawl lakih thenkhat (mi hmaisa pawl) cu Salai Sun Ceu, Salai Thuah Aung, Salai Tawna le Salai Za Lian tipawl an si ih, Salai John Tin Zam khal cumi lakih pakhat a si.

Kan dung April thla ah, U John Kalaymyo a ra tlawng ti ka thei ih cuveten live tuah dingin ka rak sawm cih. Thungaitei sim cun, anih vek artist ropi vun biak ding cu ka hreh thup deuh nasa. Asinan ka rak zum vek si loin biak a nuam in a rak tangdor tukih ka mangbang riangri!

U John thawn zan hnih live kan rak tuah; ziangahtile anih cu hla lar tampi rak phuahtu le rak saktu a si ruangah zan khat lawng cun a famkim thei lo.

U John thawn kan live ding tikah, keimai danten, a thlen-innah ka va hruai, live theh tikah dawrah lakphak ka do (in hmaisong a si ding, lakphak khuat khat lawng a in theu), cutheh le ka thlahkirsal theu.

U John vek, Myanmar music thuanthu hmanih sim le rel hlawh ringring ding mi hla tampi rak phuahtu le saktu ka live-pi ngah cu ka di a riam, ka lung a awi in ka uangaw tuk rori.

Live kan thlah theh hnu a tipsun hrawngah ruahbanlopin U John in a Facebook ah ka zuk (in rak snap mi) tar in ka parih lungawi thu simnak ca a run post cu ___ ka siar laiah ka lungtur a rung rangih ka mitthli khal a rung hal ttuamtto.
Hivek ka rak tong dah lo!

Mi ka zukpi, interview ka tuah, ka live-pi, an thuhla ka ngansak… an hnen ihsin ngahsal ding zianghman ka ruahsan dah lo. Ka parah ziang simaw in samkirsal ding khalin ka beisei dah lo lawlaw. Cuvek thinlung thawi rak tuah ka si ruangih hivek hna tutiang ka rak tuan theinak khal cu a si ko ding.

Cutiih ruahsannak nei ih thil tuah ka rak si dah lo ruangah a si men thei, U John in cipciar zetih lungawi thu simnak ca a run post tikah mak ka ti tuk; cule thu tampi khal ka ruah bet phah!

Mihlawhtling taktak pawl, thiam taktak le thei taktak pawlih nun le lungput… U John hnen ihsin ka zir ngah mi pawl ka hlawmsal duh:

1. An tangdor

U John thawi kawmawk tikah a theih mi le amai thuhla pawl rel ciamco a tum loih mi ttong thaten a ngaisawn, a theih lo mi hrangah thaten mi a sutfiang, ka duhdan le idea pawl ka ruah tikah olsamten in pompi thei.

Mi a biak tikah amah hnakih theisawn le fimsawn vekin in zoh ih ka thu a lung mi hin amah in upatterin in zahter sinsin!

2. Mi thatnak (​ေက်းဇူး) an thei ih samsal khal an tum:

Mi ka rak live-pi mi lakah U John hi a Facebook ah ka zuk tar in lungawi thu in simtu le ka tlinnak pawl in pholansaktu hmaisabik a si.

U John ih nun ihsin ka rak hmuh mi, kan hrangih thil tha in tuahsaktui’ thatnak theithiam ih kan ti theidan lamzin hmangih thil tha tuahsak tum ve hi zoi’ hrang khalah cawn ding le zir ding tha lungput a si ti ka zum.

Cun, U Johnin in cah leuhleuh ta mi cu, Yangon ka tlawn tikah amah contact tengteng dingin le zanriah tal in do a duh thu a si!

“Keimah in sunloihtu cu ka sunloih ve ding,” ti mi, Bible sungih kan hmuh mi Pathian tongkam kha ka mang nasa!

3. Mi thatnak le tlinnak an hmuhsak thiam:

Himi hi cu U John ih post ka screenshot mi zoh in a theih theih. A ca ihsin keimah le keimah hman ka rak theihawk dah lo mi, ‘ka si’ ti khalih ka rak ruahawk dah lo mi siseh, ka rak hmuhawk dah lo mi ka thuhla le lungput pawl tampi a run phorhsuak ih cumi cun confidence, lungawinak, phûrnak le cahnak thar in rak pe.

A si ko, mi thatnak hmu thei dah loih an siatnak lawnglawng hawl thup ringringtu, mi tlinnak theihsak (acknowledge) ih somdawl duh loih palzutsak ta rori tumtu, mi thurel mi ngaisak paih loih mai thurel mi lawnglawng mi ngaiter tum le mi ruahnak pek mi le sim mi pawl ziangih siar duh loih mai thuthu ih nung pawl hrangah cun…. hlawhtlinnak ziktluak ngah ding cu thil cang thei lo tlukah kei cun ka ruat.

4. Caan an upat

U John thawi live kan tuah ding thu ah vei thum rori kan rak tongaw. Cumi ttum thumah vei khat hman a tlai dah lo ___ minit khat te khal a tlai dah lo lawlaw!
Caan upat ti mi hi, khatlamah, “Keimah in hngahnak ruangah mi caan a lakih liamter cu an hmaisongum,” ti mi, mi caan upatsaknak le mi zawn vun ruahsaknak thinlung ihsi ra suak mi pakhat a si tin ka ruat. Mi thawn kan tiamaw belbelih kan tiam caan ngaihsak nawn loin kan umsan ti mi cu, a pehhelzawngih mi hmuhsuamhna a si tin kei cun ka hmu!
Mihlawhtling ka kawm mi pawl hi caan hmang diktu le caan upat thiamtu an si theh ruangah, hi thil hi cu mihlawhtling pawlih neih hrimhrim ding mi ziaza pakhat a si in ka thei ih, hlawhtlin duhtu pawl cun an cawn tengteng ding mi a si ka ti duh.

5. Mipi an upat:

U John ih tangdorzia le a mipi pawl a upat thiamzia hi cu mangbangza rori a si!
Ka post mi a rak like ih comment khal a pe fekfek; cule comment zaten a siar thluh ih a like theh ih tlunah a tuldan izirin a reply hai. Hivek hi cu a post-tu ka hrangah a nuam in a manhla tuk ti hi ka pheh lo ding!

Mipi upat hi niamnak a si lo, mipi hnen lungawi thu sim khal fatetnak a si lo ti le, mah cawisangtu cawisan ve hi ningzahthlak a si lo ti mi cu..
Myanmar rampum hngor ko rak hminthangih kum 60 tlun upa zo mi U John hi a theifiangbiktu pakhat a si ka ringhlel lo!!

Hi thu pawl ka ngan tikah midang pawl vuihramnak simaw, mawhthluknak le thangsiat duhnak simaw.. a um hrimhrim lo ti hi ka rel duh tuk.

Kan miphun pumpi hi ‘a tinak cang thei lo’ le ‘thu thiam lo’ kan si tlangpi.
Cumi ruangah kan zate mitvangtertu a si ding ruahsannak thawn hi thu hi ka run ngan mi a sisawn.

Keimah khal mi hnen ihsi zirawcop ringring mi ka si ve. (credit – Mai Sokhlei Par – Chinland Rose)

Leave a Reply

Your email address will not be published. Required fields are marked *