Champhai ih um Falam mi hnen ah Covid – 19 Nathrik Hmu

Mizoram, Champhai ih Quarantine luttu Falam mi hnen ihsin covid 19 nathrik an hmu thu theih a si.

Amah cu Champhai ih ummi a siih Febuary 2020 ah Falam ah tlawng in Hrangṭhio bualrawn kiangah a um. Falam ahcun Pu Vai Thawng Lian (kum 56) tiin theihmi a siih Mizoram ahcun Pu Thawm Liana tiin an ko.

Tui` kum Chin Phunpi Ni ṭheh hrawngah Falam ah a thleng ih Covid – 19 ruangah mizoram lam lockdown a si ruangah tlung thei loin Falam ah a tang.

June 23, 2020 ah Falam ihsin Rih ah a so ih, cutin a umnak Champhai lam pan in a tlungsaal. Champhai a thlen hnu ah YMA pawl in zaan nazi 11 ah an hruai ih Quarantine an lutter cih.

Quarantine lutnak ah test nak an nei ih Covid – 19 positive a si timi an theisuak. Amah cun Falam a um lai le a tlunnak lamziin ah Covid – 19 a ngah ding a zumawklo. Champhai a thlenhnu Quarantine umnak ihsin ngahmi siding a zumaw.

Hih thuthang a suak veten Covid – 19 Falam Committee ṭuanvo neitu pawl cun Pu Vai Thawng Lian, Falam a um lai ih a fehnak le ariaknak pawl an zingzoi cihih a umpi mi mino pahnih khal Lungpi Ciinthlak tlawngah Quarantine in an um ter zo a si.

Falam siibawipi Dr Tluang Cung Thang cun, “amah kha kum upa a si tikah zaan ah amah lawng riak ding a remcang loih mino tlangval pahnih in an rak riakpi ṭheu. A hmaisabik ah cumi mino pahnih ih SWAV kan laak dingih nathrik a um lo ahcun Falam ihsin Pu Vai Thawng Lian in nathrik a ngah lo tiah sim a theih ding ruangah midang pawl cu kan laak nawn lo ding. Mino pahnih hnen ah nathrik a um pang ahcun Pu Vai Thawng Lian Falam a um sungih a pehparmi zate hnen ah a sulhnu zawt thluh saal a ṭul ding” tiah a sim.

ref:CH daily news
zuk:Wiki,Salaiphotography

Leave a Reply

Your email address will not be published. Required fields are marked *