CDM thu ah Falam palik pakhat cun hitin a rel ve

Kandung baite ah Myanmar rampi buainak thu thawn pehpar in Falam peng ih cozah hnaṭuan, CDM i tel duh lotu dem nak le Falam palik cetcangdan soiselnak catawite cu kan mah Falam community sungih Facebook hmangtu cahmai pawl ah share sawngmi hmuh ding a tam zet.

Leitlun kilkip i um Falam mi le sa pawl i share sawng mi ahcun hitin an tarlang.

“Ziang ah Falam Palik hnaṭuan pawl 90% Falam mi nan si, GAD ih hnaṭuan pawl A lu ih sin thok Laimi nan tam sawn, Penghuap Fimzirzung Hotu ihsin thok laimi nan si. Cozah hnaṭuan ah Falam mi nan tam sawn.

Falam mipi nih ziang kan duh nan thei! Mipi laamzin suak in kan tuah rero mi hnakin nan mah nih hnaṭuan nan cawl a sile tuih kan duh mi cu thlakhat hlan ah kan ngah ding si!

Ziang si nan tih, hnaṭuan suak maw nan tih. Hnaṭuantu umloin cozah a ding theilo. Nan mah nih CDM ah nan tel le a ṭheh. Nan tefa sin hrang ruat uh. Thaisun in inn ah um uh!

Cun, Ralkap thawn hnaṭuan tlang duh/caanṭha lak duh vek ih a um mi party hruaitu pawl, upa pawl tla kan lo thei thluh, rak ralring uh. Nehnak kan ngah ni ah …..” tiah tarlang a si.

Hih thuthawn pehpar in Falam palik pakhat cun hitin a tarlang ve.

“Na ngan ṭha tuk, nan, palik cu maw, a dang cozah hnaṭuan vek si sehla midang ai cun kan suak hmai sawng ding. Midang cu an suak ih CDM an tel thei. Kan nih cu kan suak ni in Thawnginn ah kan um ṭul. CDM ah kan tel thei ve lo ding.

Kan mah palik Daan in kum 3 Thawng to ṭul. Midang vek kan si ve lo pi. Ralkap uknak tla cu kan nih palik hrang ahcun ram a buai hlan ihsin kan hua tuk zo. Ek zoh in kan zoh mi a si. Tukhal mipi lam ah a cang thei dan in kan um ve so khaw. Kan nih cu midang vek kan si ve lo pi.

Atikcu kim cun mipi lam ah kan si ve ko ding. Hman seh Thawnginn sung ah nufa u le nau rualpi sungkhat pawl tan in CDM tuah ding cun kan hrang a har tuk ding ee. Kan thinlung sungten CDM”.

Zuk : a remcang mi kan run tarlang mi a si

Leave a Reply

Your email address will not be published. Required fields are marked *