CDM thu ah Falam Mino pawl Lungawi Lo

Ralkap uknak dodal in Falam ah duhphorhnak neih a si rero lai ah duhphorhnak pakhat a si mi CDM dinpi lotu an um ruangah Falam mino pawl an lungawi lo thu theih a si ih Facebook cahmai khal ah nasaten an tarlang.

Falam mino pakhat cun “kan mah hrang lawng duhphorhnak neireromi khal kan bang. Nisa leikhu lakah dangcar Leicar in Falam kan heel. Culaiah CDM tuahtumlo cozah zung ṭhenkhat pawl CDM tuah dingih kan nor mi cu nasaten in soisel ih tuah ṭullo tukmi nan tuah tiah in ti.”

“Miṭhenkhat tla cun ralkap uknak dodal in duhphorhnak kan nei mi le CDM hrang hma kan nor mi cu thazang in pek hlei ah tidai thawn maw arti buh in maw in rak ṭanpi bet. Cuvek duhsaknak kan vun tong bet cun kan thin a na zual. CDM thapek lotu cu Falam Sunmang balsiattu an si.” a ti.

Mipakhat khalin Falam khuasung ih CDM lungkimlo thu ah Falam GAD lubik Pu Ca Awi cu nasaten a soisel a si.

Amah cun “Kan Falam, khuasung CDM ah lungkim lo ih, Ralkap le Kawl hnen ṭang Falam tlangkulh hotu Pu Ca Awi,,, na ning zak aw. Mipi thih le dam karlak ah mitthli thawn a phunphun in kan ṭangrual. Kan tumnak hi ziang ruang ah, Min Aung Hlaing hnen tangin na rak dokalh. Kan Falam cu a miphunpi hnen ah a hmaibal a thinhar hokhaw” ti`n Facebook cahmai ah a tarlang.

Kawl ralkap in rampi thuneihnak a la hnu ah ralkap uknak dodal in Falam ah duhphorhnak voi6 an nei zo. Tuisun February 13 khal ah Falam mino hohanak in mawṭaw/cycle thawn lamzawh duhphorhnak an nei ih ralkap uknak dodalnak le Falam khuasung cozah zung zate ah CDM nei thluh dingin nasaten an au a si.

Leave a Reply

Your email address will not be published. Required fields are marked *