CDM ih telvetu ramsung Cozah hnaṭuan pawl hnen ih cakuat – Rev Sa Tin Lal

Phunpi Unau zate’n,
Seemnak ram ih um zatein nannih in nan taksa rori in nan tuar ih ningṭih thlaphang in nan umnak hi ramleng hmuntin thleng nan unau pawl khal in taksa in nan hnenah kan um lo nain thinlungtak tuarnak thawn nanmah lo cuan in it lo siing loin kan um cio.

Ziangkim hin tikcu caan a nei ih Chinram, Chin miphun mibang lo dinhmun sung ihsin luat suak theinak, Pathian ih canvo in pekmi atak ih cang suak dingin sangka in on sakmi caan hi kan liamter lo ding a thupituk.

Tuni ah Kawlrampi huap in tuahmi CDM cangvaihnak hi Pathian ih in pekmi canvo Chinmi in kan hmuh suak theinak ding karbak Pathian ih in on sakmi a si ruangah Acozah hnaṭuantu zatein nan umnak hmun cio ihsin hnaṭuan cawl in CDM cangvaihnak ah tel cio hram uh!

88 Cangvaihnak ah Mino pawl in Pa le tiih thuron ding kan neih lo lawng si loin Ralkap ih uknak an hun laak vete’n sungsuak fahniang pawl cu mit-hmai ṭha ngahnak ih zuartu ah pa le tampi a cang sawn.

2021 CDM cangvaihnak ah ṭih le khur cingin hmailam hrang ruat in ralṭhazet ih CDM lam in hruaitu Mino, A dinpitu Pa le pawl upatnak kan lo pe. A cem tiang kan ti thei tawk thazaang suah in thlacamnak thawn kan lo dinpi ding, ti hi hngilh hlah uh.

Chin miphun le Pathian a ṭhen-awk thei lo vekin Pathian ram hrangah le kawhhran hrangah nunnak pe in hnaṭuan rerotu Pastor, Evangelist pawl zatein Pathian duhdawtnak le miphun duhdawtnak thu hi a phuan lawng si loin atak in kan mipi hrangah nunpi in CDM cangvaihnak ah kan mipi pawl ih hmai ah dingin kan mipi pawl zonzaih, kaihkhih an ton ding ai-ah ralṭhazet in kan mahsawn ti ngam in CDM cangvaihnak hi hruaitu si thei hram dingah thazaang lo pek kan duh.

Pathian kan biak caan ah thinlungtak tein thudang ruat loin bia uhsi! Thla kan cam caan ah thinlung phum tein thlacam cio uhsi! Atu hi hnaṭuan caan a si tikah ziangdang hman ruat loin ralṭhazet in hnaṭuannak ah kekar in kan mipi hi kaihruai hram uhsi! Kan mipi ṭih le phang, aanhai ih an um hi na zoh men thei ding mawsi?

Mission lungput nei in Mission hnaṭuan cakzettu miphun kan si vekin CDM cangvaihnak hi Mission hnaṭuan tuumpi a si tiin kawhhran ih sum le pai thawn khal in a cang thei tawkin ṭanpi cio hram uhsi!

Khua le ram hrang ruat ih MP le CAM khel tu Party hruaitu pawl kan mipi in aanhai in an lo hlamnak aw theih sak hram uhsi. Thlakungzawntu dinhmun ih dingtu dingah Pathian ih in kan miphun hrang ih in pekmi nan si. Mai party timi lungput um siang loten thathar Nonawn hrang ruat in raltha zet in hmai in nor pi hram uhlaw.

Ramsung um pawl aanhai ih an um lai ah an hrangih ruahsanmi umsun le an hna a ngamtertu umsun cu ramleng thlengtu nanmgmah hi na si. FaceBook ih lungzuur kuahko ih cangan lawng le hlaraal ih darbel tum lawng tawk ti loin Pathian in keimah hi ziangruangah hitawk ah i thlengter timi hi ruat in a cang thei tawk sumpai thawn siseh, kiang le kap kan thlennak ram ah ṭanpi sawm in ṭanla hram dingah kan lo sawm.

Rampi cangvaihnak CDM cangvaihnak ah tel duh loin kan um a si ahcun mi in rin-um lo miphun tiah kan fanau san tiang an run ti ding. Mipun thuanthu mawite ngantu si zuam hram aw.

Pathian ih in pekmi canvo kan ngah suak theinak dingah zumtu pawl thazaang tampi kan suah a ṭul. Pathian in sangka in on sakmi caan ṭha hi sullam nei loin liamter hram hlah uhsi!

Thil diklozet/ṭhalozet a tuahtu do suah theinak dingah CDM cangvaihnak ah Pathian hnen thlaza cam phah in sih-cih aw tein mah le tithei zawngin ṭan kan laak cio a si ahcun Pathian hmin in nehnak kan co hrimhrim ding.

Rev. Sa Tin Lal
President, International Chin Christian Fellowship
General Secretary, CBANA

Leave a Reply

Your email address will not be published. Required fields are marked *