CDM ih telthoktu Falam GAD ih hnaṭuan mipathum cu Hnaṭuan ban an si

Falam GAD zung ih hnaṭuan mipathum cu mipi lam ah ṭangin ralkap ukhruai dodalnak CDM i an tel ruangah a langten hnaṭuan an ban thu theih a si.

Hnaṭuan ban tuar pawl cu Mai Rebecca, Mai Ca Len Par le Mai Siang Hlei Tlem te pawl an si ih CDM i an telnak zarhkhat hman kim hlan ah GAD zung lam in hna an ban hi a si.

Hna an ban thu ah GAD zung cun theihternak ca an suah ih CDM cu ramkhel party cangvaihnak thawn a pehpar ruangah 2008 Daanhrampi vekin hna kan ban a si tiah an tarlang.

Theihternak ca ahcun “Falam GAD zung ih cozah hnaṭuan mipathum cun Civil Disobedience Movement ah an tel thok thu zung lam ah ca thehlutnak an nei ih Social media lam khalah an tarlang.”

“Cumicu ramkhel party cangvaihnak ih ruahmi a si ruangah 2008 Daanhrampi ih pukmah 26 le cozah hnaṭuan pawl ih thlun dingmi Daan an pahbal a si. Curuangah March 3, 2021 ihsin thok, an hnaṭuan ihsin a langten kan ban ter a si” tiah an ngan.

Hna cawlhter thu ah Mai Siang Hlei Tlem cun “2008 Daanhrampi ahcun party ramkhelnak thawn pehpar lo ding ti a si. Asinan, atui` cangvaihnak (CDM) cu ramkhel party thawn pehparawknak a um lo. Rampi zawng ih buainak sawn a si. Party ramkhel timi cu 2020 rampi hrilawknak an tuah hlan ih mipi hip tumih cangvaihnak nei rero pawl kha an si. A cem net tiang lawlaw ka ṭang ding” a ti.

Leave a Reply

Your email address will not be published. Required fields are marked *