Headquarter suahsan ruangih mi sawisel pawl cu ningzak ding khawpin CDF ralbawi in a kap leet hai

Ralhraang SAC ralkap kahdonak hrialin camkhat hrang CDF-Kanpetlet Headquarter suahsan a si thu ah social media comment nak pawl ah awkam mawi lo hmuh ding a um.

Hivek misawisel hmang pawl hi online Rambo ti`n an ko. Atakih raldotu siloin hmun him in mi an sawisel ih, doawknak mualpi ah ziangvek thil a cang timi an ruat thiam ve lo, an ruat thiam khal le theilo bangin an um hrim tlangpi.

CDF-Kanpetlet in Ralhraang kahdonak hrialin camkhat hrang Headquarter an suahsan thu khalah online Rambo sawiselnak hmuh ding a um ih, cupawlcu CDF-Kanpetlet Brigadier General in hitin a let hai.

“Camkhat hrang Headquarter kan suahsan thu ah online comment nak pawl ah a phunphun in an rel. Asinan, Mindat, Kanpetlet le Kyaukhtu ihsin hmun 3 rorin phukpi thawn in cilnuai ih, cuti cingin zinglam nazi 8 ihsin zaanlam nazi 3 tiang meithal fate thawn catbang loin kan hum kham aw mi hin kan thisen a sah zia a ti lang. Doawknak picang maktara kan tong”.

“Dothlengnak ziik lam lawng cuan in, atakih mipi rintlak zianghman tuah velotu pawlkom pawl thawn tahṭhimawk cun kan tuah mi par ah kan diriam zet” tiah a ti.

March 15 zinglam nazi 8 in zanlam nazi 3 hrawng tiang an kapaw ih doawknak ah CDF-Kanpetlet ihsin ram le miphun hrang nunnak hlantu ralkap pakhat a um ih hriam tuar 2 an um.

March 15 doawknak thu thawn pehparin CDF-Kanpetlet ralbawi pakhat khalin hitin a rel bet.

“Doawknak ah kan zaten kan diriam ko. CDF-Mindat khal rin an tlak zet vekin The Youth Force le PDF (Saw) pawl khal theitawk suahin ralhraang in do bawm. Tha tho zetin humkhamnak ih telvetu khawmi par khalah kan lungawi.”

“A har mi pakhat cu rinlopin Mindat le Kyaukhtu ihsin sunvu deuh thaw phukpi thawn an kap bawm. Rinlopin khawsung ah Phukpi ruah a sur ih inn pawl a kaang. Kan ralkap le mipi pawl vansang mangbang in tuah ding an thei lo. Lai meithal hmang thiam khawmi pawl thawn meithal kah nak lam hoih in kan kap mei. Neta hnu ah kan dinhmun a ṭha lo thu theiciangtu saklam CDF ralkap um nak lam ihsin kum upa khawmi pawl an seherh thu in sim thei.”

“Kan dinhmun ih zirin CDF Kanpetlet Headquarter pakhat cu camkhat hrang kan suah san a si” tiah a ti.

March 15 doawknak ah ralhraang SAC ralkap lam mithi an um thei nan ziangzat hrawng an thi timi cu fiangfai in theih a si lo.

Doawknak ah CDF-Kanpetlet ၊ CDF-Mindat ၊ ယောဒေသကာကွယ်ရေးတပ်ဖွဲ့ The Youth Force le Saw – PDF tipawl an tel thu theih a si.

Leave a Reply

Your email address will not be published. Required fields are marked *