CDF – Zotung hruaitu telin Ralhraang ralkap in Chin ralkap 3 an that ih Urkaang

Ralbawi That Ceu, Commander in Chief, telin CDF Zotung ralkap 3 pawl cu July thlacem hrawngah ralhraang ralkap pawl in an that ih meisa thawn an urkaang tiah Supreme Council, CDF Zotung Organization Headquarter ihsin August 3 ah thu an suah.

Ralhraang ralkap kut ih an thlen thei dan hi a cekci in theih fel a si lo nan, kaihkhih tuar Khawmi pawl va zoh thup dingin an feh ih an ra kir nawn lo tiah ṭuanvonei mipakhat in a rel.

“Kan ralbawi telin ralkap dang 2 pawl thawn ralhraang kaihkhihmi Khawmi pawl dinhmun zoh thup dingin an poksuak ih ralhraang ralkap in July 23 ah an kai tiah kan zum.”

“Kaih an tuar thu cu Khawmi pawl khalin an thei lo. July 27 ah ralhraang ralkap pawl miruak urkaangmi rim kan thei. An ruak cu zo an si ti thleithlak a har nan mi 3 an si ruangah kan ralbawi Commander in Chief le ralkap dang 2 an si ding tiah thu kan fehter” tiah amahcun a ti.

Ralhraang kaihkhihmi Khawmi pawl cu Matupi peng Rangcci khawmi an si ih, ralhraang ralkap in July 22 ah Khawsung luhcilh in minung 20 luan an kai. Cu pawl cu August 3 ah an thlah sal tiah theih a si.

Khawmi dinhmun thlingthla dingih vafehtu cu CDF-Zotung Commander in Chief Thah Ceu, kum 40 hrawng, CDF-Zotung ralkap Aung Ming Thang le Thang Cing Mang (kum 20 hrawng veve) tipawl an si ih ram le miphun hrang nunnak an hlan mi par ah CDF Zotung Supreme Council in asangbik upatnak a hlan a si.

Leave a Reply

Your email address will not be published. Required fields are marked *