CDF – Zanniatram din thu ah Mipi lam hmuh dan Lawrkhawm

Falam peng, Zanniatram le mipi kilhimtuding Chinland Defense Froce – Zanniatram an din thu ah, mipi lakah hmuh dan a bangaw lo.

“Dothlengnak hmual na sin dingin CNO/CNDF in Falam peng ah hriamkai pawlkom dang din lo dingin thu an suah nan” ….. titu le “kan ram humvennak hrang cangvaihdan a kauter sin ding” titu an um.

Cuih thu thawn pehparin lenglam ihsin rak thlirtu ruat ṭhat tlak mipi hmuhdan ṭhenkhat kan run tarlang ding.

1. CDF Zanniatram an din ti thu theih cu thin mi a tthawng ee. Hriamkai bu pakhat ti pitlin hi peng pakhat hman in thil ol a si lo. Caan sau hrang tla ruah a ṭul.

2. An ram pawl hi SAC ralhraang Chinram a kai so nak hmun thupi pakhat a si ve ih, cuih hmun pawl ah ṭuanvo lak tu dingah an ṭha ko si. A um cia pawl in kan peng zaten ṭuanvo an la thei lo tikah …..

3. Kandung baite ih kan unau khatlam pawl buainak kha kan hngilh maw si? A hranhran ten an um ruangah lung a rual thei lo ih mipi hmai ah an sung thu an phorhaw ciam co. Cuvek kan hluan ding phan a um. Kha mi khan mipi tha a nauter.

4. Derthawng nakah in can thei. An lam ihsin hriamkai pawlkom umcia hnen ih rak lut zotu an um. Cupawl kha an thinlung a laklawh thluh ding ih hma nor dan a fuh thei lo ding.

5. Kan sawisel hlanah ziangruangah an din timi kan theitum hmasa a ṭul. Midang tha nau tertu/phunhnam zawngih ke kar tum an um ruangah a pak ten an ding mi a si thei. Cuvek lungput pawl kha kan hlon thei hlan sung cu a dangdang din thar an um vivo bet hman a si thei. Thu hi a kau zawngin ruat a ṭul.

6. Athupi bikmi kan hngilh pang si pei maw? Hriamkaibu pakhat sersuak ding cun hmaisabik ah ralthuam zeizongza a ṭul. Cumi lei nakah paisa a ṭul. Atufang kan ram dinhmun khaikhin cun Dothlengnak hi a sau lai men thei. Cumi kha kan ruat cia maw? Kan ram dinhmun le a sia vivo tikah thilman zeizongza a kai thluh bet ding. Cumi hrang kha ramdang um pawl kan rin ringring thei pei maw? Maw, din nak hman rei hlan ah mualpho nawn ten ṭhiat bal saal ṭul tivek teh a si pang leh pei maw? Ralthuam um lo cun minung an tam khalle san a nei tuk lo. Culaiah ei/in hrang ruat tel a ṭul bet. Thuk zetih ruat ṭhat a ṭul.

7. Falam peng, Kawlrawn tiang huapban CNDF hman hi duh vekin kan ṭanpi thei hrih lo. Culaiah peng sungin a dang a suak lala cu ṭanpiawk danding a va harsa zik ve. Ralhraang pawl khadidok in an hni rero ding.

8. Ziangvek a si khal le thuhla a feh rero zo ruangah hnaṭuan tlang dan ding lam sawn kha kan rel le a ṭha pei maw? CJDC ah funkhawmawk tum sehla a ṭha bik lo ding sawm?

Siarbet : Chinland Defense Force – Zanniatram an din

Chinland Defense Force – Zanniatram an din suak

Leave a Reply

Your email address will not be published. Required fields are marked *