CDF Mindat sungthu a puut darh ih SAC ralhraang cangvai tum cih

CDF Mindat sakhaan ihsin mai umnak khua lam ih tlungtumtu palik 3 thuhla cu SAC ralhraang hnen ah a puut darh ih ralhraang pawl cun inn ah lole lamziin ihsin kai dingin thu an suah.

SAC Ralhraang thuthang theihmi le cangvai an tum mi thu cu an lak ihsin a puutsuak bet ih, Cuih thu cu CDM tuahtu ralkap/ralbawi pawlkom (ပြည်သူ့စစ်သား) in FB cahmai ah an pholang mi a si.

ပြည်သူ့စစ်သား pawlkom ih admin pakhat cun “atufang ralkap ṭuanlai kan milai hnen in cakuat kan dong mi a si ih thuhla um dan cu …. CDF in palik sakhaan an siim ṭum ih an kai mi (meithal thlakin CDM tuahtu) palik Aung Myo Lwin cu thlah saal dingin August 3 ah thu an rel caat.”

“Aung Myo Lwin cun a tlung ding a si le a dungthlun mipakhat thawn Tawngkyi lam an pan tum thu le adang mipakhat cu Irrawaddy ramṭhen lam a pan tum thu a relsuak. Cumi thu cu SAC ralhraang hnen ah a puut darh ih an tlung nak ding hmunram ralhraang ṭuanvonei pawl hnen ah kai dingin ralring cia dingah thuthannak an nei zo. Cumi thu cu ralkap ṭuanlai mipakhat in thirhri thawi in theihternak in nei” a ti.

ပြည်သူ့စစ်သား thusuahmi thu ah mipi lam in “CDF Mindat lakah dalan an um tinak siding” tiah an let saal nan “pawlkom tintian thawn pehtlaihawknak kan nei lo ih thuthang kan dongmi kan pholang zo. Tuahṭulmi le thuhla ummi cu anmah CDF lam in ṭuanvo an la ṭul” tiah ပြည်သူ့စစ်သား cun letsaalnak an nei ve a si.

ပြည်သူ့စစ်သား pawlkom cu SAC ralhraang ukhruainak duhlo ruangih CDM tuahtu mipi lamṭang ralkap/ralbawi pawl ih dinsuahmi a si ih mipi thawn zarhkhat voikhat online hmuhton thusutnak an nei ringring tiah theih a si.

Leave a Reply

Your email address will not be published. Required fields are marked *