CDF – Mara ralkap, Salai Ma Hnei kapthattu an thei zo

March 25 ah hriamkai Mara ralkap bu 2 an ti aw thiam lo ih, meithal an hmet puak hlei ah CDF Mara ralkap Salai Ma Hnei an kap that.

Salai Ma Hnei kapthattu cu Maraland Defense Force (MDF) ralbawi Thomas Chozah (ဦးချီပါး) a si tiah an buainak Ngaphai khawmi, upa pakhat in a rel.

Thantlang peng, Ngaphai khawmi upa pakhat cun “amah hi ဦးချီပါး tiah an ko ih Kawl ralkap rak lut dah a si. Hriam tuar ruangah colhlami a si ih, atu ah Maraland Defense Force ralbawi (စစ်ဦးစီးချုပ်) a si” tiah a ti. .

Maraland Defense Force စစ်ဦးစီးချုပ် ဦးချီပါး (The Chin Journal)

Khawmi pawl rel dan ah March 25 ah CDF – Mara umhmunkhuarnak Thantlang peng, Ngaphai khua ah MDF ralkap 9 an thleng.

Theihternak ziang hman nei ta loin nan ra tiah CDF – Mara lam in ṭhaten an sim hai nan kir duh loin khawbawi inn lam ah an feh hlei ah meithal an hmetpuak tiah khawmi Upa pakhat cun a rel.

“Mah le mah buai cu a ṭha lo ti`n CDF – Mara lam in ṭhaten an sim ih zaan thim hnu ah Tlawnginn ah thu an rel khawm. An thurel a tluang lo. An buai pehzom ih MDF ralbawi cun CDF-Mara ralbawipa kawng ah meithal thawn a kap. Salai Ma Hnei in a kut ta meithal a lak sak tum ih cutin an kap that ngah” tiah amahcun a rel ih “Khua an suah san phah ah meithal zuun 60 hrawng an kap” a ti.

Mara hriamkai pawlkom 2 an kapaw ih CDF ralkap 1 nunnak liam

Salai Ma Hnei ih ruak cu March 26 zaanlam nazi 4 hrawngah an vuiliam ih a thih thu thawn pehparin Mara – CDF in CNF hnen ah thuhla an sim fel ih CNF lam in thuhla zirzoinak kan nei ding tiah an let saal a si.

Maraland Defense Force (MDF) cu Kawlram a buai hnu ih dinmi hriamkaibu an si ih ralkap thazaang 60 hrawng um in, AA kaihruainak hnuai ih raldo zir an si.

Chin ralkap pawl mah le mah an kapaw nak san relfiang

MDF cangvaihdan thu thawn pehpar in Mara upa pakhat cun The Chin Journal hnen ah hitin a sim.

“An nih hi SAC ralhraang do hnakin Mara hmunram hrang cangvai dingih dinmi hriamkai an si. Mizoram, Saiha hrambun Mara Administrative Territorial Council kaihruainak hnuai ih cangvaimi an si” tiah a ti.

Leave a Reply

Your email address will not be published. Required fields are marked *