CAM cuh tu ding Pu San Thawm Thang na Vote ṭul nak san

Pu San Thawm Thang hi, Pu Sa Tin Mang le Pi Za Nei Zing tei fapa a si ih, a nupi hi Pu Tlan Kar le Pi Lawng Thui tei` fanu nautabik, Nu Thian Nei Kim (Hmuntha khua a si) a si. Fapa unau 6 le Fanu 2 a nei.

Kum 1963 ah Falam peng Selawn khua ah a suak ih 1982 kum ah Leilet khua ah an vai. Tu ah, Kalay Myo Taungzalat ward ah an um ih tukum in Kalay Myo ih an umnak kum 11 a kim a si.

Fimthiamnak lamah Falam khawpi ah 1983 kum ah phun 10 a rak zir. Anau hak lai ihsin mahte todelh awk tumzetmi a siih, kawlram hmun dangdang, India le Nepal, China le Thailand lam ah sum hawlih khual tlawng ṭheu a si. Hmuh tawn nei tam, mifel zet a si.

2011 ihsin Kalay Myo, Taungzalat ward ah Bike thilri dawr ih kan mino pawl hrangah, hmathlir neiin leknak (Gym le Betmanton) stadium khal sumpai tampi cem liam ih bulpakin tawl rel theitu khal a si.

Kawlram a cozah ṭhatlonak ruangah anu apa ti um lo in Mizoram ih an ṭuan duhlo hna hmuahhmuah ṭuan in kan um lai ah mi tampi damlo in thihnak tiang kan tuar. YMA in veng sungah ruang luh in siang lo ih a then unau ruang latu hman um lo ih, sizung mithi retnak ih kan um laiah Pacang zetih kan unau ruang in tuamhlawm saktu, a theih dandan ih in humtu le kawlram tiangkhal ruang kan tlun theinak dingih tuan vo rak la ringring tu pakhat a si ve.

Kawlram mipawl YMA ih inn san in siang loih kan mangbang lai ah si seh, Kum 2003 kawlram mi dawisuah runpi lai ah, mitthli canghnap thawi kan um lai khalah Central YMA hruaitu le veng ṭhen hotu pawl hmai khalah ral tha zetih miphun rak dinpitu le lo theih loih dawi tlung mipawl, an tlunnak ding Motor le sumpai tianghman zanlai ti um lo ih, rak buaipi tu khal a si fawn.

Cun LCF Aizawl ah President OB hna dangdang kum ziang mawzat rak tuantu a si.

Cun pakhat ka theihmi cu, Aizawl Bethesida sizung neitu hin Miphun a duhdawt le a rin um nak hi a uartuk ruangah a sizung ah kawlram mi, mi harsa rori ti ih a simsak mipawl a lakih sizung um ter ding a rak tiamih mi ziang maw zat khalin ham thatnak an rak ngah phah zo a si, a nih hi a thlennak hmun tin ah Miphun hrang hnatuan nak ah hotu a silo hmanah zoh thim tlak zetih pum pe aw tu a si.

Lairawn a thlen hnu khalah Lairawn ah pawlkom kan neih sun Chin Pawlpi ah a thei tawkin a rung hmang aw ih tu ah hin Central Chin Pawlpi ah Secretary hna, Lairawn, Falam, Hakha, Mizo Kohhran 300 tlun tuan tlangnak Relief Pawlkom khalah Secretary, le Kalay Myo Christian Thlanmual Commitee khalah Sumpai kiltu (Treasurer) a si.
Tuihlan ih an buaipi zetmi, Kalay Christian thlanmual Ramri cuh awkmi thu buai khal, tu ah khuangkulh ti fel thluh a si zo.

Kum 2011 sin damlo mangbang thisen oek ṭul pawl bawmtu khal a mai hoha nakin tluangten a feh hnu ah Miphun hmin ih fehpi a duh ruangah Chin Pawlpi hnenah tuanvo pe in tui ni tiang Pu San Thawm Thang ih keneh thlun in a feh rero a si.

Falam, Hakha, Mizo țangtlangih hnatuan nak CCRF Chin Christian Relief ti ih kan rak theihmi khal cu tu ah Register a si zo ih himi hmin hin kan unau Kachin, Paletwa raltlan pawl le Kalay Myo Hakha le Tio innkang ruangih harsat tuartu pawl khal bawmnak pe a siih, Kachin Refugee Camp tiang rori khal amah feh ih, kan Chin thuan thu in ti mawitu a si. Politics lam ah hin Kum 2010 rampi hril awknak ah Individual le NLD rak bawm in nasa zetin a rak tang.

Kum 2015 khalah Pawlkom rinsan tu pawl in CAM le Zatkuat Lal ti vek tla cuh dingih sawm rero a rak si nan Kalay Myo ih a umnak kum 10 a kim lo ruangah a tel lo. A si nan MP le veng Lal hril awknak ah Commisionar in tuan vo a rak pekmi Miphun dang khalin an tihzah le rinsanmi pakhat a si ve.

ZIANGRUANGAH (CAM) A CUH TI LE
Kohhran le Luhmuhzi Pawlkom ihsi Miphun hrangah hlawhtinnak taktak hmuh dingih tuan theinak lamzin a mal tuk ruangah Pathian ih pekmi a vission ti hlawhtling dingin tum tahnak hngetzet thawn Chin Mipi hrang Politics hruangsung lutin CNLD Party ih sin CAM tokham a run cuh ve nak a si.

Sagaing CAM si ih tuansuak dingih a tumtah mi pawl
1. Chin Miphun hngetkohnak dingah Chin Nunphung, Calai, Pupi Leiram humhim ih kan covo diktak ngah dingin.

2. Chin zate fumkhawmtu Commitee dinding.
(a) Laimi umnak Leitlun ram kipah Sub-Commitee din Camp Adviser ret vivo ding.
(b) A ṭulnak hmun zate ah zung le hall pawl neih thluh tum ding.
(c) Chin Mino zirnak, Lekpannak, Hnatuannak ding ram sung ram lengah hawlpi ding.
(d) Ram leng Company Pawl le bulpak pawl thawn hnatuan tlang thei dingih hmalak pi ding.

3. Chin Miphun suahkehnak bulhram hawl suakih kan Orginal ṭong, Thuanthu pawl hawl suak dingin.
Hi a thuan thu tawi le Manfesto ih sin kan hmuhmi cu, Zir sang Degree nei thatha ti aw pawl hman ih an ruah le theih banlo mi vission a nei ih cu mi tumtahnak tuansuak dingin a rinsan awknak hi a si. Mi bawm ruangih a ngahsal nak dinglam silo ih bawm lo ruangih an parih harsatnak a um ding kha a ruat sawn tu a si.

Kan sim zo bangin a nih hi sum dawnnak lam biaknak lam le kan Mino hma thlirnak lam khalah Policy nei tha le kan Chinmi Hrin hnam dangdang lak khalah rinsantu nei tam hmel theih neitam le mi raltha, Chinmi kilkip thansoh nak dingih kan tul sammi in silhkhahsak dingin ni hlawh oelh le neih siah heu ih in dinpi ngamtu ding a si.

CAM cuh ṭhen khat hi cu tuihlan ah kan Soceity le harsa bawmnak mangbang can khal khawpi venghnen Miphun ai awih ih lang dahlo tokham duh ruangih rung ti lar aw tla an si. A sinan Pu San Thawm Thang hi cu a tuan taktak kem maw tiih buai ding a um lo, kum 20 lenglo Miohun rian ih zoh thim tlak nun hmangtu Chinmi dik tak a si fawn.

Mi ih palbet le nautat thleidan kan si kan ti rori mi phunrit khal CAM a tuantu ding dik tak Pu San Thawm Thang kan hril tlin ih kan Miohun le kan ram kan ṭuan ter a si ah cun kan phurrit tampi in sawng ding a si.

Curuangah a Manfesto “Lungrualnak cu cahnak” Mai kungparah par uh ti bang tukin Chinmi kan oar mawinak a lang thei nak dingah kan Chin mipi in Pu San Thawm Thang hi tling tengteng dingin tangtlang uh si ti’n kan lo sawm a si.

Vnc Vante

Leave a Reply

Your email address will not be published. Required fields are marked *