Mithiam kan hril tikah

Kawl thufim ka uarmi pahnih an um. “(ချစ်တိုင်းလဲ မညား။ ညားတိုင်းလဲ မချစ်) duh-aw tin in an co-aw lo, co-aw tin in an duh-aw lo” timi le (တော်တိုင်းလဲ မကျော်။ ကျော်တိုင်းလဲ မတော်) a thiam hmuahhmuah an hminthang lo, a hmingthang hmuahhmuah an thiamlo” ti pawl tla an si.

A taktak cun a thiam ngaingai mi pawl hminthan nak colo an umdah lo. A hminthan nak a tam le a mal lawng a danglam. Cun, hminthang mi pawl hi thiamnak neilo an um lo. An mah tawkten thiamnak an nei ruangah hminthang thei mi an si. An thiamnak a sang le a niam lawng a danglam.

Pawlkom nak pakhatkhat in (Award) mithiamsang hril-awk nak kan tuah tikah buainak a tam nain thathnem nak tampi a suahpi ve. Laksawng cotu in a thiamnak mipi i theihpi (recognition) a ngah tikah zuam sinsin duhnak thinlung a nei ter. Uar-aw ding lawng cu a si lo. Thiamnak taktak zuam-aw silo in thiamnak parah mi theihtam (fan) zuam-aw a si theu ruangah a si.

Falam ih hoha mi zuam-awk nak a si ahcun falam mipi ih hril deuhmi an si tikah falam mi in vote a ngahtam ding. Cuvek thotho in Hakha in siseh Tedim in siseh an hoha ahcun hriltlin mi a danglam thei. Cucu thil um dan a siko. Jesuh ih thlaici vorh tahthimnak ka mang (Matt 13:1-10). Thlaici ih thil tithei nak an bangrep thluh nain thlaici tlaknak a hmun a dang tikah a rahsuah tla a danglam thei ve. Lamzin par ih thlaici tlak a si ahcun a hloral ta. Ramthat nak ih tlak a si ahcun a let tampi a rah thei. A tlaici ih quality a thupi bangin a tlaknak hmunram le a tikcu khal a thupi.

1994 US ram Cairn University Philadelphia PA ah Music tlawng kum 5 sung ka kai lai ah laimi mipi in music hi thupi ih rello laifang a si. Pacangtha pakhat ih zirtlak a si tin an hmu lo. Music hi lamlak mino huatsuak pawl ih ta a si tin an ruat ih biakinn hmanah guitar keng sianlo san a si. A hnu kum 25, tu san mino pawl in leitlun ih music a thanso zia an hmu ngah tik lawngah ka music thiamnak hi man a nei lai.

Fimnak thiamnak pawl tla (အချိန်မှန်၊ လူမှန်၊ နေရာမှန်) tikcu remcang, minung remcang le a umhmun mipi remcang a thupi tuk mi a si. Na thiam zet khal ah umnak hmun, tikcu remcanglo a si ahcun manneilo a si thei. Hminthan nak cu sunlawinak pakhat a si nain thil hmuahhmuah a si thluh lo. Leitlun ah buaipi tul tampi a umlai ti hi cing a ṭha.

(Ca ngantu : Stanley Hmung)

Leave a Reply

Your email address will not be published. Required fields are marked *