Bungbel tum ruangah Falam Mino 2 Thawngthlak Tuar

Belkheng tum ruangah kaihkhih tuarlawk nan Aa-mah-khaannak thawn camkhat sung thlah lawk mi Falam mino pahnih cu February 8 ah Falam Civil court in ni 7 thawng tlak dingin daantatnak a nei tiah theih a si.

Myanmar rampi cozah uknak thuneihnak laktu ralkap dokalh langternak cu zaan nazi 8 hrawngah rampihuap in bungbel talawnnak thawn caan hmangcio a si ih Falam khalah nasaten cangvaihnak an nei ve.

5 February zaan ih cangvainak rak neivetu Falam mino pahnih cu ziinpi ah suak tahratin thawmvang tuah ciamco ruangah ti`n palik in an rak kai.

Kaihkhih tuar mino pakhat cun “kan naute in thawmvang ring a celh lo ruangah inn leng ah suak in bungbel kan tum mi a si” tiah facebook cahmai ah a tarlang asi.

Falam Mino rual in palik zung ah an va dinghnawh ih palik lam cun a zaanzaan rorin an thlah sal lawk ih February 8, Falam Civil Court ah Aa-mah-khaan 500/- pek ding in an rak tiam.

February 8 a thleng taktak cu Civil Court in ni 7 thawngthlak dingin daantatnak a rak nei a si. Hih thuthawn pehparin palik lam ih thil ti dan cu Falam Mino Pawlkom in nasaten a soisel ih “Tuni Aa-mah-khaan pek ding in zung an fehnak ah ni 7 sung thawnginn to dingin degree an rak chhiah riai.

A um zia cu, palik in Taza in rak cuaisak thotho ih Damiah pawl bang in kan rinsannak le kan zumnak cu remcang ah lakin in rak bum tinak a si riai aw! Maw, Falam Palik, Mipi mitthli na tuar ngam maw si?” tiah Facebook cahmai ah an tarlang a si.

Bungbel tum ruangih kaihkhihtuar Falam Mino 2 thuthawn pehpar in FMP lam in ziangvek hmalaknak a nei tum ti cu tarlang a si lo nan ralkap uknak dokalh duhphorhnak cu an nei pehzomtum vivo a si.

*Mino pahnih thawngthlak thu ah Falam Mino Pawlkom cun hitin theihternak ca an tarlang.

An Thutiam an Bal
Falam Palik cun 5 February 2020 zaan ih Bel le kheng tumtu mino pa 2 in thlahsak mi kha Civil Court ah tuni ah Aa-mah-khaan 500 pek ding in an rak tiam ta ih kai lo in Aa-mah-khaan lawng thun dingah an rak tiam ta.
Mipi humtu, mipi ih Palik tiah kan rak uar zet.
Tuni Aa-mah-khaan pek ding in zung an fehnak ah ni 7 sung thawnginn to dingin degree an rak chhiah riai.
A um zia cu, palik in Taza in rak cuaisak thotho ih Damiah pawl bang in kan rinsannak le kan zumnak cu remcang ah lak in in rak bum tinak a si riai aw!
Maw, Falam Palik,
Mipi mitthli na tuar ngam maw si?
Mipi pawl tu hnak in tan lak kan tul thlang a si hi maw?

Leave a Reply

Your email address will not be published. Required fields are marked *