Bualrawnheel Lamziin ceekmi thu ah BBC biakinn lam ih um pawl an Thinphang deuh

Falam : 2021, January 11 ihsin laih thok a simi Hrang Ṭhio Bualrawnheel lamziin thu ah Tlanglo veng, Bethlehem Baptist Church (BBC) biakinn lam ih um miṭhenkhat thin a phang deuh.

“Mawṭaw lole Mawṭaw cycle thawn kan lengsuak tikah Hrang Ṭhio bualrawn hi ziinpi pakhat i kan hman bikmi a si. Atui` Bualrawnheel ziin thar laihmi hile Laizo khua hlun ziin ih vasuak dingin sialmi a si” tiah Tlanglo veng, tangtaziin hnuai sin ih um mipakhat in a sim.

Hrang Ṭhio bualrawn cu Laizo ziin le Tlanglo tangtaziin hnuaisin ih um pawl in ziinpi vekih an hmanmi a siih Lehpannak lole puai tivek an nei lai a si khalle Bualrawn tan duh an um cun kian lawk ṭul dinhmun a si ṭheu. Curuangah cuvek hnaihnoknak umlo dingin Bualrawnheel ziin an tuah nak san a si.

“Ceek rero laimi ziin ṭheh suak in kan veng fehnak bualrawn an phit cun kan hrang ah a buaithlak zet ding. Curuangah kan veng ih um miṭhenkhat cu an thinphang deuh” tikhalin Tlanglo veng ih um mipakhat cun a sim hrih.

Hih thu thawn pehpar in Falam Siipin zung ih ṭuanvonei Pu David Van Tun cun “atui` bualrawn heelnak ziin tuahmi cu Laizo ziin fehtu hrang lawngah a si. BBC biakinn lam umtu le Lailak tlawng fehnak hrangah bualrawn kan phit hran lo ding.”

“Ṭuan rero laimi bualrawn heelnak lamziin kan ṭheh hnu lawngah khalam heelnak lamziin hrang ngaihven a si leh ding. Cukhal cu pehpartu pawl zate kokhawm in ruahron khawmnak kan nei leh ding” tiah CH daily news hnen ah a sim.

Hrang Ṭhio Bualrawnheel lamziin cu Bualrawn thlanglam ah pee 400×12 sau kau dingin an tawlrel ih pee 500×12 sau sang cangdawl thawn 2020-2021 ramkulh Siipin budget ting 1552 cemliam ih tawlrel reromi a si.

Leave a Reply

Your email address will not be published. Required fields are marked *