Aung San Suu Kyi dinhmun A Sang vivo – Dr. Run Bik

Myanmar ram pumpi ah tu lai ah thu neitubik hi NLD hotu Aung San Suh Kyi le ralkap hotu Sr.Gen.Min Sung Hliang an si ti a si theu.Hrek khat tla cun Min Aung Hliang hi a thupi bik an ti.

Min Aung Hliang hi kum 2011 kum tir ah Than Shwe i a duhsak ruangah amah hnak I mirorum an um nan ralkap hotu bik ah a rak ret. Kum 2011-2015 I tamadah Thein Sein san ahcun No.3 a si. Thein Sein le Tura Shwe Màan a tlun ah an um. Kum 2015 hrilawk ah ralkap le USDP pawl cun Hlutdaw I ralkap 25% le USDP in 26% an ngah cun NLD in 48% ngah hman sehla NLD cun acozah a din thei lo dingi USDP in a din ding ti an rak zum ngai ngai.

USDP cun neh sehla Thein Sein khan tamadah kum 2 maw a tuan kei cui hnu ah Min Aung Hliang a lut ding. Asinan 2015 hrilawk ah NLD cun seat 80% zikte a run ngah I,USDP cun 8% hrawng lawng a ngah. Cutikah Min Aung Hliang cun amah a thu in 2016 ah kum 60 a kim nan kum 65 a ti tiang I ṭuan thei dingin a run tuah aw. Suh Kyi cun tibuaiawk hnakin ti in a rak kham lem lo.

Min Aung Hliang cun Suh Kyi I hnaṭuan pawl a run hnaihnok ṭheu i mi thiam pawl i an ruah dan ahcun Rohinja tiaw pawl ralkap I Bangladesh I an dawi hi Suh Kyi buai sehla amah Min Aung Hliang hi Bhuddist hrang I ṭuantubik ah mi in ruat sehla ti ruang I himi tuah an si tin an ruat.

Kum 2020 hrilawk ah tamadah can thei a tum ti cu kum 2018 I Min Aung Hliang I state le region pawl ah an CM pawl an mah ten hril thei sehla ti I a rak tong mi in a theih theih. USDP cun 26% a ngah thei lo ding ti a theih tikah state pawl ah ralkap MP pawl bomnak In tiangzinta party pawl CM an tuan thei cun tamadah dingah tlang par mi pawl in a mah an bom ding tinak a si. Asinan November ni 8 hrilawknak ih USDP le tlangpar party pawl thuphan an si tik ahcun Min Aung Hliang hin thu dang in a nawr lala. Tui kum June thla ah a pension a ṭul si. A pension cun ICJ le ICC a tih si.

Cui ruangah USDP thawn NLD hin vote dik lo in an tling. Union Election Commission I a zingzoi lo i an lungawi lo cun ralkap in thuneihnak a la lo ding an ti thei lo an run ti. Amah Min Aung Hliang rori in kum 2008 daanpi hi kan thlun lo cun kan hlon men ke cu ti tiang a run ti. January ni 28 tla ahcun Myanmar ram khawpi 5 tlun ah ralkap tank le personal carrier pawl an lut. UNO le USA tel in ram 20 lai cun Nov.ni 20 hrilawk kha pom cio uh. Thubuai cu daanpi hmang I rel fel uh an run ti.

Thuthangca le internet online khal ah a hlei ce in Min Aung Hliang hi an thua ciamco. 1988 tlawngta hotu Jimmy tla cun ralkap I ram le democracy an duh ngaingai ahcun Hlutdaw ihsin an suah a ṭul a ti. Min Ko Naing khal in ralkap I thuneihnak an lak cun kan do let ding a ti.

30-1-2021 ni sun hrawngah Min Aung Hliang I office cun thu an suah I ralkap cun Daanpi an kil him ding. Min Aung Hliang I tong mi kha media pawl in an la kawi a si an ti. Himi thu an theih cun mipi khal an hna a ngam. Himi buai lai hmuahhmuah ah Suh Kyi cu ziang hman a ṭong lo. Himi Myanmar ram politic I a buai ni 5 sung ah hin media le online in Suh Kyi an ṭan thu le aanaasin an duh lo thu lawnglawng an ngan.

Electoral roll dik lo nan ti fel hmaisa lo ih Hlutdaw meeting nan tuah ahcun aanaa kan ting lo ding ti kan sim thei lo an rak tinan tu ahcun 1-2-2021 ni ah Pituh Hlutdaw pi an to khawm ding I Hlutdaw chairman le vice chairman tla an hril thlang ding. NLD acozah thar kan lo pom ti ding in Myanmar I um American le ram 5 lai in ambassador rori le ram 20 lai in an palai pawl tla Hlutdaw meeting ah an kai ding.

Suh Kyi a kai sang deuh I Min Aung Hliang a tlaniam deuh.

Leave a Reply

Your email address will not be published. Required fields are marked *