Atufang Mindat dinhmun (April 27, 9 pm update)

Midat khuasung luttlang theilo ruangih kahawknak cawl lawk dingin SAC ralbawi in mipi hnen ih zangfah a dil hnu, nazi kar rei fang ah Chinland Defense Force – Mindat le SAC ralkap an kapaw thok sal tiah The Irrawaddy in mipakhat simmi sirhsanin a ngan nan, khuasung biaktlangtu media ṭhenkhat cun zaan nazi 9 tiangah kapawnak a um bet nawnlo tiah an tarlang.

Mindat ah April 24 in doawknak a suak ṭan ih kaphnih ah mithi le hliamtuar tamsawntu SAC ralkap cun Mindat khuanu/pa ṭuanvonei ဦးရွှေနိုင်း cu palai ah hmangin kapawknak cawl lawk dingin CDF-Mindat hnen ah a sim thei ter.

Cuih tlun ah khualeng ih um ralkap tamzet cu khuasung ralkap buuk ah lut ter dingin an dilngen nan CDF-Mindat lam cun an co hlanglo.

CDF-Mindat lam khalin kahawknak cawl lawk ding cun thu 3 tiam dingin SAC ralkap hnen ah dilngennak an nei ve. Cumicu ..

1. Mindat khuasung ih umhmun khuartumtu khuadang ralkap hmuahhmuah kir ter sal ding.

2. Mipi lam kaihkhihmi hmuahhmuah thlah zalen thluh ding.

3. Mindat khuasung ih umhmun khuar ralkap hmuahhmuah tlan ter thluh ding .. tipawl an si ih SAC ralkap lam khalin reilote ah thu let nak kan nei ding tiah an sim than ve.

Mindat khuasung um pawl thawn biakpohnak neiawtu rintlak media ṭhenkhat cun “cumicu zaan thim hnu tiangih theihtawksun thuthang a si ih zaan nazi 9 tiangah khualeng ih khambetmi ralkap pawl cu khuasung an lut thei lo vekin kaphnih in kahawknak a um bet lo” tiah an tarlang.

April 24 in tuisun April 27 tiangih Mindat doawknak ah SAC ralkap lam amalbik minung 15 an thi zo tiah theih a siih boruak thlirtu pawl cun kahawknak a um pehzom vivoding an zum.

zuk : Mindat (.org)

Leave a Reply

Your email address will not be published. Required fields are marked *