Atufang Hakha boruak (3 May, 5 pm UPDATE)

May 2 ih SAC ralkap le CDF Hakha an kapaw hnu, May 3 khalah mizaan ih kahawknak Cawbuk veng in meithal puak thawm a thang tiah theih a si.

Khuasung um ṭhenkhat cun zaanlam nazi 3 luan hrawngah meithal puak thawm kan thei tiah an sim ih “thinphang in dawr khal an khar nasa. Kan mah khalin meithal puak thawm kan thei” tiah FOM hramhnget pakhat hnen in thuthang kan dong.

Chinland Defense Force_ Hakha khalin meithal an hmet puak thu mipi an sim thei ih “Hakha Cawbuk veng check-gate ah khualtlawng sukso hnaihnok in an check ruangah kan kap mi a si” tiah an tarlang ih mithi le hriamhma tuar tivek cu an um lo.

Mipi humtu CDF Hakha le SAC ralkap cu mizaan May 2 zaanlam nazi 6 hrawngin Cawbuk veng ah an kapaw thok ih CDF – Hakha lam in amalbik ralkap 4 tal an kap that tiah thu a suak nan ralkap lam cun ziang thuthang hman an suah lo.

SAC ralkap cun May 3 ah Thazaang tamzet thawn khuasung heelkual in an dinhmun an ti lang.

Atufang Hakha boruak cu ziangtiklai khalah sosang puakkuai thei dinhmun si in a lang ih khuasung vak sukso khal a hlan ai in an mal zet tiah thuthang kan dong.

zuk : The Hakha Times

Leave a Reply

Your email address will not be published. Required fields are marked *