Atufang Falam peng Doawknak thu um cin

Falam-Hakha ziinpi ah ralhraang le mipi ralkap pawl an doaw thu theih a si ih atu ah ralhraang ralkap hi Ramthlo le Dokthek karlak ah an tang lai tiah thuthang kan thei.

Ralhraang ralkap hi July 7 ah Falam ihsin Hakha lam pan in an poksuak ih lamziintluan ah Chin ralkap ṭangkop pawl thawn doaw phah in inn tampi an urkaang.

Doawknak ah Falam khuasung vankautlang ihsin ralhraang ralkap in meithaltum thawn an kap bawm ih cuti cing in mipi ralkap in thei tawk suahin an do rero a si.

Doawknak ah ralhraang ralkap an tuar na tiah theih a si ih mipi ralkap lam ah CJDC sungtel Commando ralkap pakhat in ram le miphun hrang nunnak a hlan tiah CNA thawn naivaitu mipakhat in a rel.

“Mizaan ah Ramthlo khua ah riak in tuni July 11 ah Hakha lam pan in an pok saal. Ramthlo le Dokthek karlak ah mipi ralkap thawn an doaw ih ralhraang ralkap mawṭaw 4 lai an lak sak zo ti`n thu ka thei. Mipi ralkap in dunglam le hmailam ihsin hmun 2 rorin an do. Falam khuasung ihsin ralhraang ralkap in ralthuamtum thawn an kap ve.”

“Mipi ralkap lam ah CJDC sungtel commando ralkap pakhat in ram le miphun hrang nunnak a hlan. Tu khal hi Falam ihsin ralthuamtum thawn an kap nasa ih kan Chin ralkap pawl hrang napin thlacam sak an ṭul” tiah amahcun a rel.

Doawknak ah Chin ralkap CNDF, CDF, CNA le CJDC sungtel ralkap pawl an tel ih doawknak thu cipciar siseh, tu ni an kapaw thu le mithi um thu tivek cu official in thuhla zianghman an than hrih lo.

Siarbet : Ralhraang ralkap in Falam peng ah Inn tampi Urkaang

July 7 in Falam ihsin Hakha lam pantu ralhraang ralkap in lamzintluan ah inn an urkaang phah vivo ih July 10 tiangah khua dangdang ah inn tampi an urkaang.

Lamzintluan ah Chin ralkap thawn doaw phah vivo in July 9 ah Ṭaal khua inn 29 an urkaang tiah Chin National Organization in July 10 ah thu a suah.

Ṭaal khua ah innkhi 36 um in, kan dung kum lam ah ralhraang ralkap in an rak urkaang zo ih, tuṭum ah an urkaang bet hnu ah a tang mi inn 5 pawl khal an boh ih innsung thilri an fir tiah CNO cun thusuahmi a tarlang.

July 10 khalah Tlangzar khua urkaang betin zaanlam khuathim tiangah inn 6 a kaang.

Falam-Hakha ziinpi doawknak ah ralhraang ralkap an tuar na ih inn tampi an urkaang hlei ah Thlanrawn biakinn le inn pakhat ralthuamtum thawn an kap siat.

Doawknak ah ralhraang ralkap thi an um thu theih a si nan ziangzat an thi ti cu felfaiin thuthannak an nei hrih lo.

Ṭaal khua ih Inn him um sun …..

Leave a Reply

Your email address will not be published. Required fields are marked *