April 7 : Kalaymyo Kahawknak ah mipi lam in 11 nunnak liam

April 7 zing ih SAC ralkap le mipi kilhimtu Kalay Civil Army kahawknak ah mipi telin KCA ralkap 11 an thi tiah theih a si.

Tuhlan nihnih-thum hrawngin SAC ralkap pawl cu Tahan seh vel ah cangvaihnak an nei mi hmuh ding a um ih mipi lam in kahawknak a suak sal pang pei maw tiah thinphang in an um lai ah April 7 zinglam nazi 5 hrawng ah SAC ralkap pawl in mipi kilhimtu Kalay Civil Army umhmun khuarnak Bochuk ziinpi ih camp cu an kap thok.

“Khua thim lai a si ih meithal puakawn ka thei cu ka ṭhang dukdi. Tuhlan nithum hrawng ah khan Kalaymyo ah ralkap mawṭaw tamzet an rak thleng. Ralkap vanzam khal voi 2 a rung ṭum.”

“Cuvek boruak thawn zaan it that a theih lo ih zinglamri ka it that fang ih meithal puak cun kan san sung ih ka tep dah lomi thinphannak a suah ter. Cuih tlun ah bomb meithal puakawn a suak bet cu ka Lu a pawr thluh. Ka Lungtur a rang ih ka thin hnaka tiang a na thei” tiah Tahan, **** veng ih um mipakhat in a sim.

SAC ralkap pawl ih meithal kah awn le RPG bomb kahawn cu hmun hla khalin a thawm an thei ban… hinah video….

Bomb an kah nak camp ih um mino ṭhenkhat cu a hmun rori ih thi khal an um ih bomb puak ruangih kut bul khal an um tiah a hmutu pawl in an sim.

Mipi humtu KCA ralkap khalin an neih hmuahhmuah suah in an kap ve nan hmanmi ralthuam a thlauawtuk tikah mipi ralkap cu dungah siip in an camp cu ṭhiat darh in a um.

SAC ralkap pawl cun khuasung ziinpi lamin mipi bawmtuding ra thei hai hlah seh tiah ṬadaOo luan Bochuk ziin par ah motor tire pawl an urkang ih lamziin an phit.

Ralthuam thlauawtuk ticu Mipi ralkap pawl cu dung an siip vivo ih Hmunlai lam ah an kapaw vivo bet. Kaphnih lam in boruak a sa hethet ruangah miruak ṭhenkhat cu thiartu um lo in ziin lai ah tanta in an um.

Cu lai ah Wesley Siizung ih zaan duty U Lalsiamliana cu hnaṭuan a tlun lam ah ralkap pawl in an kap ih a mah khal SAC ralkap pahnih in an zawn tiah a hmuntu pawl in an sim. Amah hi fa 3 nei zo a si ih an kap ngah hnu ah ralkap siizung ah an kuat cih tiah theih a si.

SAC ralkap pawl cun mipi kilhimtui` camp ṭhiatbal lawng duhtawk loin rinhleh um mino an timi pawl cu an kai hluahhlo.

Tahan ih um mipakhat cun “Tuṭum buainak ih amak kan timi cu SAC ralkap pawl in mipi kilhimtu pawl ih cetcang dan theithiam vek deuh ih an um hi mak kan ti zet.”

“Mi an kai mi hi kan hmuh rori ah mi 10 luan an kim. Ṭhenkhat cu innsungta rori an dir suak. Cuvek dinhmun a si tikah kan lak ah SAC ralkap lamṭang miheektu an um si pei maw tivek tiang ruah ding a um” a ti.

Ralkap pawl ih kaih mi mino pawl cu dunglet in an kut an ṭawn hlei ah an mit an hup sak ih hmundang ah ralkap motor thawn an phur.

Tuhrih tiangah, Tahan ih kahawknak cu sun hlan ah a zia um ih hliam tuar khal an tamzet. SAC ralkap lam khal hliam tuar le mi thi an um tiah theih a si nan mithi zat le hliam tuar zat felfai in theih a si lo.

Mipi lam cu amalbik 11 thi in hliam tuar le kaihkhih tuar khal an tamzet tiah ramsung rintlak media ṭhenkhat in an tarlang.

Edit : Zaanlam nazi 2 hrawng ah SAC ralkap pawl cu Hmunlai vengih inn par pawl ah kai in lamziin feh sukso pawl an bih phahphah hlei ah a cangcang ah meithal an hmet puak tiah theih a si. Tuhrih tiangah mithi, hliamtuar le kaihkhih tuar pawl hi ziangzet ciah an si timi theih fiang a si lo ih zo pawl an si tikhal thu felfai a suak hrih lo.

Kalaymyo khuasung ah hin March 28 ah SAC ralkap le mipi an kapaw ih cuih ṭum ah mipi lam in 5 an thi tiah theih a si.

Leave a Reply

Your email address will not be published. Required fields are marked *