April 29 : CDF – Mindat le SAC Ralkap karlak thurel cipciar

Chinland Defense Force – Mindat le SAC ralkap tureltlangnak cu April 29 ah nei pehzom a si thu theih a si ih CDF – Mindat lam in dilngenmi an nei vekin SAC ralkap lam khalin dilmi an nei ve.

Kaphnih hmaton thureltlangnak siloin Mindat khuanu/pa hruitu le biaknak lam hruaitu palai ah hmangin phone thawn biakawknak an nei mi a si.

CDF – Mindat cun ralkap kut ih um kaihkhih tuar mipi 6 thlahzalen ding, Khuasung ah meithal kengin ralkap vakter loding, Mi inn siim in hriamhrei ralthuam hawl nawnlo ding ti`n dilngenmi 3 an nei ih SAC ralkap khalin khuasung ih ralkham buuk pawl ṭhiatbal thluh dingin dilngennak an nei ve.

Hih thuthawn pehparin CDF – Mindat hruaitu mipakhat cun “tlunlam bawi upa hnen ah simtheinak an nei hmasa dingih cuhnu lawngah a ciang ding. SAC ralkap lam ih dilngenmi cu tuisun ih kan dilmi 3 in let dan ah a ṭhumaw. Nan, kan thu a rual khalle khuasung ih kan kian dingmi ralkham buuk pawl ah ralkap umhmun khuar ding cu rem ka ti lo” a ti.

SAC ralkap in Mindat mino 7 an kai ruangah ralkap le Mindat mipi (CDF) cu April 24 in an kapaw thok.

Mipi lam in an nuai neh ih khua dang ihsin Mindat lam ra pan ralkap 30 lenglo khal khualeng ah an ceepreek ih dungkir theilo, hmainor theilo dingin Mindat mipi in an kulh thluh.

Cuvek dinhmun a si ruangah le SAC ralkap lam mithi an tamtuk ruangah ralkap lam cun kapawknak cawl hrih dingin zangfah an dil.

April 27 ah kaphnih lam dilngennak neiaw veve in biakremnak an neiaw ih SAC ralkap in an kutsung ih um kaihkhih tuar 13 ah mi 7 an thlah. CDF – mindat khalin kaphnih biakawknak an nei vekin khualeng ih ralkap 30 an kharhkhum mi an thlah ve.

Mindat doawknak ah SAC ralkap 20 luan an thi tiah theih a si ih CDF – Mindat lam ah tuhrihtiang thi le hlo an um lo tiah theih a si.

Tuhrihah Mindat boruak cu a dai hrih ti theih a si ih hmailam boruak cu tuisun dilngennak an nei mi ah a ṭhumaw a si.

Leave a Reply

Your email address will not be published. Required fields are marked *