A phone ka vun Call cu rak kai tu an um nawn lo – Pi Tawk Ve Thluai

Pi Tawk Ve Thluai in a fapaduat Paralṭha Salai Tluang Tin Lian (kum 23) ih thuanthu a rel sal mi video tawi cun a zohtu Lunghnoter.

အာကာသူအောင် tikhalih kohmi Salai Tluang Tin Lian cu Pu Khin Soe le Pi Tawk Ve Thluai tei` fapa pathum lakih lailak a si.

Mi bawm duh le zangfahnak Lungthin i khat Salai Tluang Tin Lian cu Kalay Phunsang Tlawngah Math 3rd Year kai rero lai a siih 2021 Dothlennak ah pumpeaw in miphun le ram hrangah nunnak liamtu a si.

“Internet ah ralkap kut tuar ih thi mino tamzet an ummi kan hmu ṭheu ih nu pakhat dinhmun in ka lainat hai zet. Culaiah kan innsang ih vanduainak a thleng ve cu zum a har zet” tiah Pi Tawk Ve Thluai cun mitthli luang phah in a sim.

Salai Tluang Tin Lian cu amah ṭhirual, nu le pa ih zohkhen cawp ṭul an tamzet lai ah cuvek minung a si ve lo. Ṭullo nakah paisa a hmang dah loih mahte todelhaw thiam tlangval rintlak pakhat a si.

“Mi bawm hi a mai nuncanzia a si. Zovek mihring par khalah lainatnak lungput neitu a si. Miduhdawt khal a thiam ih, ralkap dokalh cangvaihnak nei dingih a feh tik khalah kan thinphang ding phangah in sim ta duh lo. Cutluk rorin mizawnruat le a dik lomi dodal ngamnak lungput khal a nei” tiah a duhdawtmi a rualle pawl in an sim.

Salai Tluang Tin Lian cu SAC ralkap in Tahan ralkham buuk an siim ṭum April 7 zing ah ram le miphun hrangah a nunnak a liam a si.

A nu cun “A rualle pawl in buainak a sosang tiah in sim. Curuangah ka fapa sehreh in zinglam nazi 8 luan ah a phone ka call cu a kaitu khal an rak um nawn lo. Arualpa lamlam in phone a rak kai. Ka faduat awann ka va thei lo ve ka ti cu ralṭha zetin in liam san zo tiah in rak sim” a ti.

Paralṭha Salai Tluang Tin Lian cu SAC ralkap kut tuar in mipum 12 an thih ṭum April 7 ih nunnak liam ve a si ih, a ralṭhatnak le ram, miphun hrang pumpeaw ngam nak cu mipi in theihpi in April 8 ah ropi zetin an vuiliam a si.

Leave a Reply

Your email address will not be published. Required fields are marked *