Falam ah nithumnak Lamzawh Duhphorhnak nei pehzom

Ralkap uknak duhlo lamzawh duhphorhnak cu rampi huap in hmun tinkim ah nei cio a siih Falam khalah Falam Mino Pawlkom haihotnak in a nithumnak Lamzawh duhphorhnak an nei pehzom tiah theih a si.

Falam ih Lamzawh duhphorhnak an nei hmaisabik cu February 7 ah a siih cuih ni ah Falam mino 100 luan in Vankau, Cinmual lamtiang fang in lamzawh duhphorhnak an nei a si.

Nihnihnak Lamzawh duhphorhnak cu February 8 ah Hrang Ṭhio bualrawn ihsin an ṭan thok ih minung 2000 hrawng an tel thei tiah theih a si.

“Nikhatnak kha cu ralkap cozah in internet a phit lai fang a si ruangah mino pawl kan sawmaw thiam lo. Nihnihnak kha cu hmaisa ai in let 10 zikte in mipum kan tam” tiah lamzawh duhphorhnak ih telvetu mino pakhat in a sim.

February 9 khalah nithumnak Lamzawh duhphorhnak cu Cimual bualrawn in an ṭan thok ih atu ca kan ngan lai tiang duhphorhnak an nei rerolai a si.

“Mizaan ai in minung kan tamsawn in ka thei. Zing 9 hrawng in kan ṭan thok ih a tu tiang cu buaibainak kan tong hirh lo” tiah duhphorhnak ih telvetu mipakhat cun a sim.

February 1 zingih rampi thuneihnak latu Myanmar ralkap dokalh duhphorhnak cu Chinram khuapi hmun dang khal ah an nei cio ih “ralkap uknak kan duh lo” ti`n an au cio a si.

zuk : FMP

Leave a Reply

Your email address will not be published. Required fields are marked *