2021 Dothlennak : Chinram san thuanthu ah Hngilh Ni umlo dingmi Nipi

2021 Dothlennak thuanthu ah hngilh ni umlo dingmi Nipi danglam cu tuisun May 8 ah Hakha peng sung ah a thleng.

Cumicu Hakha Chinland Defense Force ralkapbu in Surkhua ih SAC ralkap/palik Sakhaan lak sak in an urkang mi hi a si.

Mipi dilngennak le CDF – Hakha ih ralrinpek theihternak cakuat poisa loin mah cangvaih keelten cangvai rerotu SAC ralkap cu CDF – Hakha in May 2 ah an kap thok.

A khaat2 in nithum an kapaw ih Chinland Defense Force Headquarter ca suah mi ah CDF – Hakha kut tuar in SAC ralkap 9 an thi zo tiah an tarlang.

May 4 hnu in CDF – Hakha cangvaihnak hmuh ding a um cuca lo nan, May 8 zing ahcun picang zetin Surkhua ralkap/palik Sakhaan lak sak in an langsuak sal a si.

SAC ralkap/palik Sakhaan laksakmi thu ah CDF – Hakha ih ṭuanvonei mipakhat cun “Sakhaan ih um ralkap/palik hi 15 hrawnghrang an si ding. Meithal kappuak ṭul loin an tlanhlo thluh ih olsamten Sakhaan kan lak sak. Kan duh ahcun Sakhaan dang khal olsamten kan lak thei timi theiter in ralrin peknak ah kan hmang mi a si. Kan dilngenmi an cohlang lo cun cangvaihnak kan nei pehzom vivo ding” tiah a sim ih “umhmun khuar thei nawnlo dingin Sakhaan kan urkang lawlaw” a ti.

Hakha Chinland Defense Force in SAC ralhraang an kap tiih thusuak ṭheu cu rak zum lemlotu khal an um ih tuisun Sakhaan lak thu khalah zum hnailo vekin ṭongsuak le cangan an um.

Cuvek a si ruangah CDF – Hakha ralkapbu cun Surkhua ralkap/palik Sakhaan laksak a si hnu an urkang lai zuk cu online ah an theh darh ih 2021 Dothlennak thuanthu ah hngilh ni umlo dingmi Nipi thlalak ṭhenkhat cu Chin socialmedia khawvel ah a darh thluh a si.

Leave a Reply

Your email address will not be published. Required fields are marked *