2020 : Falam ih Mi cuangce zohṭhimtlak pawl (2)

Falam hrambun Chinland Herald Daily News cun 2020 kumpi kum khat sungih Falam dinhmun a thlir sal ih tualsungum zohṭhim tlak tiih a ruahmi mi 10 hrilnak a nei.

Cumi lakih mipahnih cu tarlang a si zo ih, atu khal ah mipi hrang riantu ṭha tiih a ruah mi cozah zung hnaṭuantu Dr Tluang Cung Thang, Pa David Van Tun, Pu Lian Thang le rampi huap in Falam mawinak pholang ringring tu Salai Piang Piang (Eden Studio) te pawl a hril.

Pa David Van Tun
Pa David Van Tun cu Falam Municipal zungih Executive Officer (E.O) a siih Falam khuapi mawinak, thianhlimnak le um nuamnak hrangah zuam zettu a si.

Falam Mino Pawl thawn ṭang tlangin mipi hrangah tlawmngai hmalaknak nei ringringtu a si. Hnawm hlonnak, tidai peknak, khuapi zoh mawinak pawl hrangah teima suahtu a siih Falam hlimnak hrang ṭuan ringringtu a si.

Pa David Van Tun

Dr. Tluang Cung Thang
Atufang Falam siibawipi dinhmun in hnaṭuan rero lai a si ih, Falam a thlen veten Siizung kiangkap ṭhansonak hrang hmalak ṭuto cihtu a si.

Covid boruak ah Falam khuapi him thei dingin online in siseh, lenglam ah siseh Falam nasaten ṭanlatu a siih mipi thawn rualrem ten hnaṭuan theitu a si.

Siizung ih ṭulsammi pawl ah acozah hnen a sim thiam ih cozah budget thawn tuah remcang lomi pawl khal tualsungum pawl thawn ṭan la in hmalaknak neisuak ringringtu a si. Thisen hlutu pawlkom dinsuahnak ih hohatubik a si ih Falam hrang a tuah ṭuanmi par ah sunloih phu rori a si.

Dr. Tluang Cung Thang

Salai Piang Piang (Eden Studio)
Anih hi Falam khuapi mawinak pawl fuh zetih pholang thiamtu a si. Falam khuapi ih mawinak tintian cu online ah a zuk thiamnak thawn a pholang tikah Falam ih duhnunnak pawl cu midang pawl khalin sunglawizet in tep ngah tertu a si.

Amah a um zarah Falam khuapi cu hnamdang mi tampi khal in online ihsin an theih phah hlei ah hminsintlak a simi Surbung Vanzam tualrawn onpuai tivek khal ah amai` zukmi pawl hlir in leitlun hmun ti`n luah ter theitu a si.

Salai Piang Piang

Pu Lian Thang
Falam Electric zung vuanthok bawi Pa Lian Thang cu dunglam ihsin hnaṭuan semrem theinak hrang ṭangzettu a si.

Meisa a siat ding khalle online ihsin mipi hnen theih ter cianak a tuah ṭheu ih ziangruangah a siat timi khal an zung FB page ihsin mipi simthan ringringtu a si.

Christmas boruak ih Falam khuapi ceimawinak khal ah electirc meisa pawl vaang pempem dingin a hnaṭuanpi pawl thawn nasaten rak ṭuantu a si. Falam khuapi tleumawi dingin duhsakzet ih ṭuantu a si.

Leave a Reply

Your email address will not be published. Required fields are marked *