2020 : Falam ih Mi cuangce zohṭhimtlak mipahnih

Falam hrambun Chinland Herald Daily News in 2020 kumpi kum khat sungih Falam dinhmun a zoh sal ih cumi ah mi cuangce pawl hnrilnak a nei.

Pakhatnak ih a hril mi cu A&M Mobile dawr tuahtu Pa Anthony a si ih pahinhnak cu zohṭhimtlak tlawmngaitu Salai Timmy Van Biak Lian a si.

1. Zohṭhimtlak dawrtuah thiam Pa Anthony
A & M Mobile dawr tuahtu Pa Anthony Yan Lynn Aung, cu CH daily news in a liamcia kum 2020 ih Falam mi cuangce dinhmun ah a hril.

Amah cun kum 2011 ah A & M Mobile dawr a tuah thok ih 2020 kum sungah dawr thar pahnih ong bet thei dinhmun tiang hlawhtlinnak a hmu a si.

Atu ah dawr 4 a nei thlangih hnaṭuantu 13 thawn nitin dawr ong mi a si. Falam ih dawr pawl lak ah tuan bikih ong thei ringringtu a si ih khar tlaibik khal a si.

Cuih tlun ah a dawr ih thil leitu pawl par ah service ṭhate pekin promotion phunphun tuahtu a si.

2. Zohṭhimtlak Tlawmngaitu Salai Timmy Van Biak Lian
Amah cu Covid 19 boruak ṭum hnihnak ihsin Covid – 19 Falam Volunteer hotu a ṭuan. Quarantine Facility hrang le Covid 19 boruak thawn pehparmi ah tlawmngai suahtu a si.

Covid – 19 Falam Volunteer dinhmun ihsin Falam Volunteer pawlkom thar dinsuahtu khal a si ih Covid – 19 Responese Team Falam mawṭaw leinak hrang ṭansuahtu khal a si.

Falam khuapi laili ih Christmas ceimawinak hrang tawlreltu khal a si hlei ah online ihsin hla mawi pawl cu Falam khuapi hrambun in sersuah dingah tlawmngaitu khal a si.

Leave a Reply

Your email address will not be published. Required fields are marked *