2013 – 2016, Surbung Airport TimeLine Thlirnak

Tuahsuak ni teh a um ngai leh pei maw, tiin um thei ding saduhthatnak lungput thawn kan pu-pa pawl ih rak sial dahmi Surbung Airpot cu ṭheh lam pan in zaṭek 97% ṭheh a si zo ih lungawi um zet.

Airport ih a ṭulmi hmanrua pawl, a ṭha maw ṭhalo tiih Flight Check tuahnak khal tluangten an ṭheh thei zo ih, zaṭek 3% tuahbet ding ni hngak in Chin mipi in kan cuan rero.

Culaiah, zaṭek 97% ṭuanzomi par ah bulpak, pawlkom khathnih in mai ṭuansuak thei ruangih cangsuakmi vekin tlang an au ih mipi lung a ti buai zet.

Curuangah rintlak a si mi VCTH ih rak post dah mi Falam (Surbung) Airport thuhla pawl cu Chin mipi ih theihciangnak nei thei ding duhsan in kan kherh sal hnik pei.

Surbung ah Vanzam A Takin Ṭum Ding – June 26, 2013

Myanmar ram Khualtlawn khaisannak hrangah ramsung hmun kerkawm deuh pawl ah Vanzam ṭumhmun 3 tuah an tum ih 2013-2014 rampi budget ah telh a si ding. Tuahnak ding pawl cu Kachin State Naung Mon ah, Rakhine State Aungman ah le Chin ramkulh Falam ah tuah ding an si tiah Myanmar ram Vanzam lam thuneitu Director U Tin Naing Htun in a ti.

Tlunlam Upa Pawl Surbung (Falam) Airport Hal – January 31, 2014

Falam khawnu khawpa pawl le tlunlam upa tuanvo neitu U Kyaw Soe le Engineer pawl cu January 30, 2014 ah Chin ramkulh ih vanzam tumnak ding a simi Sunbung Vanzam tual tuahdan ding an hal.
February thla sung ah voikhat ra sal ding an siih vanzam tual sak dan ding thuhla felfai sinsin hlethlai ding an si.
Tutiang ahcun Cozah in vanzam tual saknak Budget cu a tlak hrih lo. Tui kum Budget hman ah vanzam tual saknak si hrih lo in, vanzam tual leiram tahnak le hlethlainak budget fang lawng tla ding dawh a si.

Leitlun ralpi voi hnihnak lai ah, British ralkap pawl cun Surbung Tlang cu Airfield ah an rak hmang dah zo. Surbung Tlang hi Sea level pi 6,352 sang a siih, pi 4000 tluk ih kau le hmunnuam zet khal a si fawn.

Surbung Vanzam Tual Vanzam Thawn Hal – February 27, 2014

Surbung Vanzam tual cu rampi vanzam lam tuanvo neitu lu bik, hngunchhuk U Tin Htun, le a rual pawl in February 27 ah Vanzam fate thawn a tlun lam in zohnak an nei tiah theih a si.

U Tin Htun le a ho cu February 28 ah Falam ah ra in Surbung vanzam tual halnak an nei ding tiah theih a si.
Surbung vanzam tual thu thawn pehpar aw in peng dang lam ih dokalhnak, dodalnak tete a um nan Cozah lam in tuah an tum thotho.

Falam khawnu le khawpa, Falam MP pawl le Chin Affair Minister Pu No Than Kap pawl tla in teimak suah in an tang khawm ruangah hlawhtlin lam kan pan vivo ih a lungawi um.

Falam Surbung Airport Thu Hna-ngam Asi – April 16, 2015

Kan dung nai Hakha Post ah Hakha Khua Thar khawnu, khawpa in Hakha ih Airport tauh dingin thlacamnak le Hlutdaw ah tla cakuatnak an nei thu a phuang.

Hi thu thawn pehpar aw in thuhla phunphun a leng celcel. Hakha lam unau hrekkhat ih an comment peknak ah Falam Surbung cu anmah ten private in an tuah tum, Hakha cu cozah ih tuah sak dingin kan ngiar ding tiah an ti.
Tuzing, April, 16, RFA Chin program in U Ngun San Aung interview ah, Falam Surbung cu Chinram ih vanzam tual ah a rembik thu le cozah in Kyat 1 billion budget an pek zo thu theih a si.

Surbung vanzam tual cu 1932 ah mirang pawl in vanzam tual cek tumnak an rak nei nan 1942 ah Japan ral ruangah rak tthul sal a si. Cutin 1962 tiang ziang thuhla ngai um lo in a rak um. Newin cozah a kai in hi thu a thok sal ih central cozah in vanzam tual tuah sak ding thu a um.

Falam mipi pawl tla an thatho zet ih 1963 ah, cozah ih nem-hngetnak ngaingai a um hlan ah, mipi in thazang in thirfei, pha-hlai le tupheng thawn surbung vanzam tual an rak cek. Kum 5 sungah cozah lam in ziang thu felfai ngai a um lo ih hlei ah 1968 ah Mizo tapung in Falam bank an ruknak le palik zung pawl an lonnak ruangah hi project ṭhul sal a si.

U Thein Sein cozah a kai in Kawlram ramkulh le ramṭhen pawl ih Airport um hrih lonak cu Chin ramkulh lawng a siih vanzam taul tauh sak ding beiseinak a um. Nan, kan thu le hla cu theih cia bangin khat le khat cuh awk le mai khua ih Airport um ding duh cio a si.

Hakha, Tedim le Falam tiin hmun 3 ah thlingthlanak an nei. Cutiih tlunlam in khoi ih tuah ding ti an zoh rero lai ah Falam khawnu, khawpa in mai thazang suah in surbung vanzam tual ceknak an nei.
Falam khawnu, khawpa pawl ih zuamnak ruangah hlutdaw in Chin ramkulh hrangah Surbung vanzam tual cu nem-hnget a siih budget kyat 1 billion a pek.

Falam khawnu, khawpa upa pakhat le vanzam tual cangvaihnak ih nasa zetin a ṭangtu U Lal Tin Mang in, “Airport famkim in ṭheh suak dingin kyat 15 billion a ṭul. Tu kan ngahmi budget kyat 1 million in a diah lamlam lo. Nan, ngah lo hngak in cu a ṭha ko. Step 1 tiang, zaing maw can tiang, cu in fehpi ko ding,” tiah Myanmar Times ah a sim.

Hakha MP Pu Robin tla in, ” Airport thu thawn pehpar aw in hmuh daan a phunphun a um. Kei ka hrang ahcun khoi ih um tla poi ka ti lo. A rembiknak, a ṭhabiknak ih a um ding a thupi,” taih a ti.

Pathian in Surbung Airport project le thlanhri pawt in a zonzaitu, sumpai a suahtu zate thluasuahnak pe hram seh. A reihlan ah Falam ihsin vanzam awn kan thei cing ding ih vanzam ṭum tla kan hmu cing ding.

Surbung Vanzam Tual Pathian Hnen ah Hlannak Nei – April 19, 2015

Surbung Vanzam tual hnaṭuannak a thok, lai, cem tiang tlaungten ṭheh suak ding Pathian ih hlannak le lungawi thusimnak nei.

Surbung Vanzam tual cu cozah in Chin ramkulh vanzam tual si dingin nemhngetnak le ṭuan thoknak hrang budget kyat 1 billion a pass zo ih a rei hlan ah ṭuan thok thlang ding a si.

Hi vanzam tual a tak ih cangsuak dingin le ṭuan thamnak ah Pathian in lam hruai dingin Pathian hnen ah hlannak cu April 18, 2015 ah khawnu khawpa ih hohatnak in a hmun, Surbung tlang, ah nei a si. Hi hlannak ah CBC, FBA, Falam khawsung ih biaknak lam saya pawl, Falam Pengkulh cozah hnaṭuan pawl, Falam khawnu khawpa, ramkhel party MP, upa pawl le mino pawlkom pawl zate kom minung 200 lenglo an tel tiah theih a si.

Surbung vanzamtual an tuan thok – December 27, 2015

Chin ramkulh ih a hmaisabik vanzamtual a si dingmi Falam ih Surbung vanzamtual cu December zarh 4nk in an tuan thok tiah thei a si.

2015-2016 ah Surbung vanzamtual hrangah budget 1000 million MMK ngah a siih March thla sungah leilung rawn ter theh a si ding tiah vanzam lam pehtlaihnak Derector U Kyaw Soe in a ti.

Surbung vanzamtual cu Cozah hnen in budget ngah hlan, 2014 Octiber ihsin Falam khawnu le pa hohatnak in an rak thok. Surbung vanzamtual cu a sau lam pi 6,000 a kau lam pi 500 in cek ding a si.

Surbung Airport hrangah budget million 600 MMK tlak – February 9, 2016

Chin ramkulh ih vanzamtual a simi Surbung airport hrang 2016-2017 kum hrangah rampi budget ihsin Kyat million 600 a tlak tiah thei a si.

Falam peng Surbung vanzamtual hrangah 2015-2016 rampi budget in million 1000 MMK a tlak ih 2015 December in tuan thok a si. 2015 – 2016 ahcun a hmun rawn ter kha thupi bik ih an tuan mi a siih 2016-2017 ahcun vanzam tlannak tuah thok thlang ding a si.

Chin ramkulh Chief Minister in Surbung Vanzam tumnak hal – April 15, 2016

Chin ramkulh Chief Minister Salai Lian Luai in Chin ramkulh ih a hmaisabik vanzam tumnak a si dingmi Surbung airport project halhnak a nei tiah theih a si.

Hi Surbung Vanzam tumnak cu mi tampi in Pu Lain Luai chief minister a tuan sungah theh suak dingin an beisei.
Surbung Vanzam tumnak hrangah 2015 budget 1,000 million MMK ngah a siih 2016 ah million 600 MMK a tlak.

Surbung vanzamtual cu Cozah hnen in budget ngah hlan, 2014 October ihsin Falam khawnu le pa hohatnak in an rak thok. Surbung vanzamtual cu a sau lam pi 6,000 a kau lam pi 500 in cek ding a si.

Atlun lamih kan tar mi pawl cu VCTH ih rak post dah mi Falam (Surbung) Airport thuhla pawl an si.

Himi ca hin Chin mipi thinlung buaiter dingih ausuaktu awkam pawl cu a hlo faiter ṭheh ding ti zumnak thawn ……

ref: Cung Bik via VCTH
zuk: Piang Photography

Leave a Reply

Your email address will not be published. Required fields are marked *