2008 Daanhrampi rem thei dan Lamzin Pathum – Opinion

2008 Daanhrampi rem thei dan lamzin 3

1. Hluttaw sung in rem a theih.

Kan theih cio vek in 2008 Daanhrampi rem ding cun Hluttaw member zate ih 75% hnakih tam lungkim a t့ul bakah ram pumhuap ah mipi hnen in Daanhrampi remnak hrang lungkimpinak an la dingih “mee pe theitu zate ih hrek” a lan a t့ul. Remtinak lak ni ih mee petu zate ih a hrek lan ti a si lo. Mee pe theitu zate ih hrek a luan ding ti a si (# 436 a). Kan theih cio vek in Hluttaw ah ralkap 25% an um tikah Danhrampi rem ding cun ralkap pakhat tal ih a lungkimpi a t့ul tinak a si cu. NLD Cozah kum 5 sungah thei tawk suah in rem an tum nan an rem thei lo. Curuangah hrekkhat ih Daanhrampi rem ding cun NLD kan vote hrih a t့ul timi hi lamt့ang sawmawknak men a si. Tlingsal khal hai sehla ralkap remtinak a um lo cun an rem thei hrih cuang lo ding.

2. Peace Process (Remdaihnak/21st Panglong Conference) in rem a theih.

Hluttaw sung ihsin Daanhrampi rem a harzia cu zapi theih a si. Himi Peace Process ah 2015 Hrilawknak ih nehnak cotu party pawl lawng tel theih a si. Kan theih cio vek in Chin State ah ZCD lawng in nehnak an rak co. NLD party ihsin rinsan mi Chin pacang t့ha pawl in nehnak an co nan an Party policy sungih cangvai an si tikah di a riam deuh lo. Curuangah 2020 Hrilawknak ah tlangpar mi pawl ih covo, himi peace process ah ralt့ha zet ih rel ngamtu party an tlin ih an tel thei ve a t့ul.

3. Daanhrampi thar tuah ding.

Hihi cu thil awl a si lo. Mual in liamsan zo tu Sihni U Ko Ni in lungzi t့ha lo hmun tampi ih belh ciamco ai cun a thar lei sehla a t့ha sawn a rak timi kha kan neihcia mi Daanhrampi rem hnak in a thar tuah a t့ha sawn ti thu a relnak a si.

Hminsin: Zalen le umzia nei zet in na hmuhdan in hlawm ve aw. Lungawi.

(Pa That Luai Facebook cahmai ta lak mi a si)

Leave a Reply

Your email address will not be published. Required fields are marked *