Ṭulsammi a um ruangah Falam Innhmun Dilnak Form leitu Paisa fai in an khirh saal

Falam khuapi karh project ih innhmun phuan tharmi 247 hrangah Aug 17 ihsin dilnak form pawl cu pakhat ah Ks. 5000/- in an zuar na`n tawlreldan ah ṭulsammi pawl a um hrih ruangah innhmun dilnak form pawl cu an zuar peh nawn lo ding tiah theih a si.

Zuar peh nawn lo lawng siloin, Aug 17 ih form a leitu pawl zate hnen ah sumpai an khirh thluh saal dingih form thar tuahsaal hnu ah an zuar leh ding ti`n ṭuanvo nei pakhat in a sim.

Falam vuanthok bawi AD Pu Ca Awi cun, “hih khuapi karh tuah thu ah main committee a um ih cumi theihpinak loin form pawl zuar ih duhduh in zuar mai ding a si lo. Hnaṭuan timi cu fumfe te`n tawlrel hnu ah lehhnu ih thubuai um lo dingin ralring te`n ṭuan dingmi a si.”

“Hih thu ah, ṭuanvo neitu pawl ih thiehpinak tel loin innhmun dilnak form pawl tuah le zuarmi hi ralrin ṭulmi a si. Falam peng sung ahcun uknak lam ah DC hi a tumbik mi a siih amai` nemhngetnak tel in hnaṭuan ding sawn a si” tiah a sim.

Falam khua nu/pa hotu Pu Hrang Lawm cun, “hih thu ah Chin ramkulh cozah ih nemhngetmi hmunhma pek committee a um na`n kannih Falam khua nu/pa le Municipal zung pawl kom aw in hnaṭuan tawlrel zamrang dingah Adhoc committee te kan tuah ih thuhla umdan simtheihtu dingah kan tuah menmi a si.”

“Kanmah te`n Committee thar kan dinmi a si lo. Hnaṭuan dan pawl zamrang ding le tluang te`n tuah suak lohli theinak dingah Falam uktu pawl hnen thuhla putso ding le Chin ramkulh cozah ih nemhngetmi pawl ṭuansuak lohli theinak dingah bawm theitu si dingin kan tuahmi a si” a ti.

Tui` thuhla umdan cu acozah ṭuanvo neitu pawl tel loin Falam khua nu/pa le Municipal zung kom aw ih innhmun dilnak ca tuahmi cu official a si thei hrih lo ruangah ṭuanvo neitu pawl ih relcatnak thawn dilnak ca pawl tuah saal in hih khuapi karh project ih committee rori in innhmun dilnak form pawl an tuah leh ding tiah theih a si.

Cinmual veng le Tlanglo veng ah innhmun thar phorhsuah mi 247 a um ih Adhoc committee cun Falam khuasung ih um pastor pension pawl, Falam khuasung ih acozah hnaṭuantu pension innhlang pawl, Falam khuasung ih innhlang pawl, Falam peng sungih acozah hnaṭuantu le mipi pawl ti`n co-uu pek ding timi khal zohfel saal a si dingih ṭuanvo neitu committee ih tifel hnu ah innhmun dilnak form pawl zuar a si leh ding a si.

CH daily news
zuk:Salai Zam

Leave a Reply

Your email address will not be published. Required fields are marked *