Ralhraang do dingin CNDF ralkap timlam
Ralhraang ralkap Chinram an pan thok ihsin Kalay-Falam-Hakha ziin pawl ah doawknak a nasa ding tiah zum a rak si cia bangin ralhraang thlen nak tapiang ah mipi ralkap in nasaten an do.
Ralhraang ralkap hi Chin ram pan in March 9 ah Kalay ihsin an poksuak ih, nazi kaar lawng feh ṭul nak hmun ah zarhkhat fai an rei zo.
Falam-Kalay karlak ah Chin mipi ralkap in nasa takin an rak cilnuai ih atu ca kan ngan tiangah Falam khuasung hman an thleng thei hrih lo tiah theih a si.
Ralhraang ralkap rual hi Hakha lam an pan ding zum a si ruangah cuih hmun ih mipi ralkap pawl in nasaten do dingin timlamnak kan nei tiah March 15 ah thu an suah zo.
Tu khalah Falam hrambun CNDF ralkap cun doawknak hrang timlamnak an nei thu siseh, Falam-Hakha ziinpi ah khualtlawng sukso lo dingin mipi an theihter.
CNDF cun “Tulai boruak hi SAC ralhrang pawl a rualrual in an hawng so laifang a si. Cumi sungah mipi (30) lai an kaihmi tla an um. A rei hlan ah Falam-Hakha zin an thleng ding ruangah timlamnak nasaten kan nei. Cu si ruangah Falam-Hakha zinpi tla March 17 ihsin thokin mipi khual tlawng, veivak ralring dingah kan lo theihter. A hleice in Lamzinpi a silomi ah vak tawi, Sukso lo dingah ralrin pek phah in upatnak thawn thu kan lo than” ti`n March 16 ah theihternak thuhlapi an suah a si.
