Falam-Hakha karlak ah Ralhraang do dingin timlam cia

Kalay ihsin Chinram pantu ralhraang SAC ralkap cu Hakha lam an pan ding zum a si ih, cupawl do dingin Chinland Defense Force – Hakha timlamnak a nei cia.

Ziangvekcin timlamnak an nei timi cu theihfiang a si lo nan Khuatlang mipi him thei nak dingah March 15 ihsin thok, Hakha peng, Hniarlawn thar lam ah zohman feh lo dingin mipi ralrin an pe cih.

Hakha ihsin Falam ah feh lo theihlo thilṭul poipeng a um pang khal le mipi ralkap theihter hmasa dingin le ralring fimkhur ten um cio dingin CDF Hakha cun mipi a theihter.

Ralhraang thazang tamzet cun March 9 ah Kalay ihsin Chinram an pan ih atu ah Falam-Kalay karlak ah an tang lai.

Mipi ralkap in lamziintluan ah nasaten an rak do ih ralhraang ralkap lam ah thihlo an um hnih-thum zo tiah thuthang kan thei.

Tu dinhmun ah Falam-Kalay karlak boruak a sosang ruangah khualtlawng sukso lo dingin CNDF in mipi an theihter ve.