Falam-Kalay karlak doawknak thu theih cin
March 9 ah Chinram pan in kaisotu ralhraang ralkap mawṭaw tlar cu lamzin tluan ah mipi ralkap ṭangrual pawl in nasaten an rak nuai tiah theih a si.
Ralhraang dotu hi CDF CDM Siyin, MEDF le mipi ralkap ṭangrual pawl an si ih netahnu ah KKG battalion 7 in ral an do bawm bet tiah theih a si. March 10 zinglam nazi 8 hrawngah bomb kammi an ti puak ih ralhraang tampi hriam an tuar.
Doawk thu cu CDF CDM Siyin in mipi theihternak a tuah zo ih “March 10 doawknak ah ralhraang ralkap 6 thi in, 20 lenglo hriam napin an tuar” tiah thu an suah tel.
March 11 khalah zinglam nazi 8 hrawng ihsin zaanlam nazi 4 tiang bomb an puah hnawh bet ih, ralhraang lam mithi le hriam tuar an um ding zum a si nan a cekci theihfiang a si lo.
Tu dinhmun ah mipi ralkap in Kalay-Tedim ziinpi an phit lawk mi cu an ong sal zo ih, thusuah thluntu khuatlang mipi hnen ah lungawi thu an sim cih.
Kalay-Tedim ziinpi cu a him zo ti`n mipi ralkap in thusuah an tuah zo nan Falam-Taingen ziin lam cu zawh hrimhrim lo dingin mipi ralrin an pe.
Ralhraang ralkap pawl mawṭaw tampi thawn Laitlang lam an so pek ah khuami 30 lenglo ralkhamphaw ah hmangin an hruai cih ti`n thuthang a um nan, doawknak boruak ah cupawl zing vek dinhmun an si ti cu thusuah ah an ngan tel lo.
