Falam ah phuan suah a si mi Pukmah 144 cu ziang a si ….

Falam khuapi telin rampumhuap khua 30 lenglo ah ralhraang ralkap in martial law an phuang hnu, February ni 5 ah Falam khuapi ah Pukmah 144 an phuang.

Pukmah 144 um dan thei ciang lo le a dik lo zawng ih rak lettu an um hnin-thum ruangah Salai Thawngpi (Judge) in pukmah 144 thu a sim mi cu kan run tarlang sawng a si.

144 hi Ziang A Si – Salai Thawngpi

Hrekkhat in S.144 hi ṭihnung tukmi daan thusuah vek ah kan ruat. Daan theihnak lam ah kan tlaksam tuk ruangah ṭih a ṭul lomi tiang kan rak ṭih thluh. (ralkap uknak san ih theirah khal a si fawn) Curuangah mipi khalin tawkfang cu daan kan theih a ṭul. Theih tam thei tla ahcun a ṭha sinsin.

S.144 timi cu Code of Criminal Procedure ih caang 144nak sim duhmi a si. Himi CrPC hi daan thuhla pawl (criminal case) thawn pehpar in hnaṭuandan kalphung a si. Atlangpin thuṭhen zung, palik le uknak lam ih hmanmi a si.

S.144 thuneihnak hi thuṭhentu pek a si. Pyituh Council san ah peng council khal thuneihnak rak pek a si. Peng council timi ṭongfang kha thlengh a si hnu peng uktu khalin a hmang thei. Himi S.144 thawn pehpar in mipi ih kan theihfiang theinak dingah Covid-19 lai ih Peng Uktu in S.144 hmang in thu an rak suah khan a fiang ko ding. Mipi ih thlun ding tete a rak si. Khakha S. 144 timi thusuah umdan cu a si ko.

S.144 umdan cu mipi hrang daihnak a um caan ih an comi covo kha daihnak a um lo caan asilole mipi hrang harhdamnak ralrin ṭul tivek dinhmun ah suah a si ruangah mipi ih covo khamnak kalphung ti thei khal a si. S.144 suah caan ah mipi covo khamsak a si. S.144 suah tikah thla 2 tiang lawng a nung. Thla 2 a cem hnu ah suah bet duh a si ahcun a thar in suah ding a si. (S.144 hi thuhla tampi ah hman theimi thuneihnak a si)

S.144 hmang in mipi thlun ding suah a si tikah cumi thusuah a pahbaltu cu Penal Code S.188 hmang in mawh pek ding a si. S.188 hi thu hnih in ṭhen a si ih thu 1nak cu hnaṭuan um lo thla 1 tiang thawngthlak lole tangka 20,000 cawh lole a pahnih kop khalin mawh pek thei a si. Thu 2nak cu thla 6 tiang thawngthlak lole tangka ting 1 cawh lole a pahnih kop khalin mawh pek thei a si.

Curuangah S.144 hmang in thu an suah tikah ṭih ciamco loin thuhla umdan theih kha a thupi sawn. S.144 an suah ahcun duhduh in an tuah thei, mi an kap that thei tivek kha cu thulengvak men a si. Daan umdan a si lo. Daan vekih a hmangtu cun a tlunlam ka nganmi kha thlun a si ko.