CNDF ralkap Salai Thang Daih Suan in ram le miphun hrang nunnak hlan
February 19, zaan nazi 9 luan hrawng ah Kawlrawn hram bun CNDF ralkap pakhat a si mi Salai Thang Daih Suan (Salai Ei Naung Nauang a.k.a Salai Naw Naw) cu ralhraang ralkap kut tuar in a nunnak a cem tiah theih a si.
Amah hi CNDF Batallion-4 ralkap a si ih atu ca kan ngan tiangah CNO/CNDF in a thih thu nemhngetnak zianghman a nei hrih lo nan ralhraang ralkap lam cun a phone sung ih zuk um mi pawl le a ruak zuk cu internet cahmai ah an thehdarh zo.
CNO/CNDF lam ihsin nemhngetnak zianghman a um hrih lo bangin a thih dan cipciar hi theih fiang a si lo nan ralhraang ralkap lam cun zaan duty ralkap pawl in khuathim lakah an hmu ih thusut an tum lai ah a tlan ih kah that mi si in an tarlang.
CNO/CNDF ṭuanvonei mipakhat cun a zuk tarlang telin “NawNaw…
Ram le miphun duhdawt ruang ah mipi ralkap na lut ih a netnak ah hi ti can na cang. Kan riahsia tuk ee… Upatnak kan lo pe. Hahdam te’n rak cawl aw maw. RIP 💔 Tu zuk sung ta hi ralhrang nih an kai ih an thatmi a si. CNDF B-4 ta a si. (Raldo phah in siseh, khawsung mission in siseh CNDF ralkap nunnak a liam zo mi 25 an si zo.)” tiah a tarlang.
Falam Regional Committee khalin “Rest In Peace Our Hero.
Na thap awknak hi a lak a si hrimhrim lo ding! Na thuanthu cu kan lungthin ah kan cing nung ringring ding! A mawi mi le zomtlak mi keneh neitu na si! Nunnak tluk ih hlu mi ziang si a um nawn? Na pekawknak hi kan ram hrang rohlu a si” ti`n upatnak an pe a si.
