CNDF in Falam siatsuah tumtu Mino 3 an kai
Falam khawsung ah datsi thawn inn urkaang tumtu mino 3 cu kan Chin ralkap, CNDF in Mizoram ah an kai ngah thu an phuang ih “kan Thawnginn ah kan khum hrih. Thusutnak kan nei vivo ding” ti`n March 13 ah thu an suah.
Kaihkhih mi mino 3 cu Biak Ceu Lal, Ceu Lian Hum, Sang Lian tipawl an si ih, an cangvaihnak kiangkap CCTV zuk ngah mi le thuhla fel zirzoi hnu ih kaihkhih mi an si.
CNDF thusuah ahcun “March 5, zaan nazi 9 hrawngah misual 3 cun datsi thawn khawsung inn 4 an urkaang tum nan a kaang sia hlan ah mei an phal man.”
“An tumtahmi an tuah suak thei lo ruangah March 6, zinglam nazi 10 hrawngah Falam-Rih ziinpi, Laimual thlen hlan ih inn pakhat an urkaang.”
“An 3 in CCTV zuk ngah mi le mit rori thawn a hmutu khawsung mi hnen ihsin zirzoi a si tikah Biak Ceu Lal, Ceu Lian Hum le Sang Lian tipawlan si thu, thufelfai hmuhsuah a si ih, Biak Ceu Lal le Ceu Lian Hum cu Aizawl ah siseh, Sang Lai cu Mizoram, Zokhawthar ah ti`n an 3 in kaihkhih an si ih, atu ah CNDF Thawnginn ah kan khum hrih” tiah an tarlang.
March 6, zaan ṭim lai ih Falam inn 3 a kaang mi thu thawn pehpar in kaihkhih zo mi mino 3 pawl ih duah mi a si le silo timi cu CNDF in zirzoinak an nei pehzom vivo tum.
Mino 3 cu mipi thlaphang tertu, mipi neihsiah Inn-Lo siatsuah tumtu ti`n CNO/CNDF in an phu tawk hremnak an pe tum tiah theih a si.
