A ṭoih thluh zomi CNDF ralkap 2 pawl ih ruak an phorh suak
2022, March 26, Myanmar-India ramri buainak boruak ih ralhraang kut tuar CNDF ralkap pahnih pawl ih ruak cu April 18 ah an phorh ih Christian daan pangaiten an ruak pawl an vui zo tiah theih a si.
March 26 zing ah ralhraang SAC ralkap pawl cun rinlopin Ṭio Lilawn kiangih CNDF riahbuk an siim ih CNDF ralkap le khawmi kaihngahmi an nei.
Cuih ni thotho ah CNDF ralkap 2 cu Thlanmual kiangkap ah an kap that ti a si ih khawmi an kaimi ṭhenkhat cu Kawlrawn lam ah kuatin netahnu ah thlah saal mi an nei.
Tualsungum mipakhat cun “Khai ni ah thlanmual kiangkap ah meithal puak awn kan thei ih, miṭhen cun CNDF ralkap 2 an kap that ti`n an rel.”
“An ruak pawl cu April 18 ah phorh suak an si ih, ruak umnak an thei lo ruangah maw, ziang ruangah an phorh tlai ti cu kan thei ciah lo” a ti.
Ramsung media ṭhenkhat cun hmunhma zohfelnak an nei lai ah an hmusuak tiah an tarlang ih an taksa pawl a siat zet zo ti a si.
Ram le miphun hrang nunnak hlantu CNDF ralkap 2 cu kum 30 kiangkapmi an si ih, Salai SamSon le Salai Peka an si ti`n thu kan thei.
Nunnakliam CNDF ralkap 2 thuthawn pehparin atu ca kan ngan tiangah CNDF lam in thuthannak zianghman an nei hrih lo.
