Ramsung lawng si lo Ramleng ral pawl lakah humkhamaw thei dingin hmalaknak kan nei : Min Aung Hlaing

Ralhraangbawi Min Aung Hlaing in ramleng ral pawl lak ihsin humvenawknak hrangah ralring cia ṭhepṭhi in ramsung ralkap pawl nasaten training kan pe tiah a rel.

Cumi cu Rakhine ramkulh, Ann khua ih hmunkhuar ralkap innsang pawl a vehvai lai ah a relmi a si ih thazang peknak nei phah in thucahtawi khal a rel cih bet.

“Kan nih rampi ralkap dinhmun in Tlangpar hriamkai pawl thawn buainak ti dai dingin le ukawknak le ṭhansonak hrangah hmalaknak kan nei rualin ramleng ral pawl lak ihsin humkhawmaw theitu siding in kan ralkap pawl cu “standard Army” siding ah hmalaknak kan nei rero”.

“Ramtinkim ralkap hnaṭuan cu lenglam ral pawl lak ihsin rampi hum ding hi a si ih, ramsung hriamkai le a hrang zawng cangvaihnak pawl kham ding cu palik hnaṭuan a si.”

“Asinan, kan ram thuanthu le dinhmun zir in tatmadaw cun palik thawn kutzakai in ramsung buainak le mipi humvennak hrang ṭuanvo kan la rero a si” tiah a ti.

Cuhleiah raldo thiam dingin siseh, ralthuam ṭha neih zuam in le ralbawi pawl fimthiamnak lam ṭhansoter dingin hmalaknak an nei rero thu a rel bet ih “tatmadaw (ကြည်း၊ရေ၊လေ) sungtel zaten standard neitu ralkap si thei dingin le fimthiamnak lam ṭhangso thei dingin kan zaten ṭangrual in hmalaknak kan nei ṭul” tiah a ti.