Ralhraang ralkap in mawh neilo Khawmi a rualrual in kap that sal

Ralhraang ralkap in Shan ramkulh, Pinlaung peng, Namnein khua ah phungki 3 telin mawh neilo khawmi 30 lenglo an kap that tiah theih a si.

March 11 zinglam nazi 5 hrawng ah Namnein khua ah ralhraang le mipi ralkap pawl an doaw ih cumi boruak ah phungki telin khawmi tamzet cu ralhraang ralkap kut tuar in an thi.

Ralhraang ralkap in lei par in siseh, van par khalin nasaten kahdonak an tuah ih phungki tlawng telin khuasung inn tampi a kaang.

Khawmi pakhat cun “kan khua ah innkhi 350 hrawng a um ih phungki tlawng telin khua hrek deuh thaw an khaang. Kahdonak boruak ah phungki tlawng ah khawmi tamzet an beu ih mizaan tiangah ziang an cang ti kan thei lo. An hlo thluh” tiah Shan news hnen ah a sim.

Cupawl cu ralhraang ralkap kut tuar in an thi thluh ih an ruak pawl cu hmunram thianfaitu mipi ralkap pawl in an hmu sal mi a si.

Phungki 3 telin miruak 30 hrawng phorhsuak a si zo ih, ruak zohfelnak an tuah hnu ah vuiliam an tum tiah theih a si.

Tu dinhmun ah KNDF, KA, DMO PDF tipawl telin mipi ralkap ṭangrual pawl in ralhraang nasaten an do laifang a si.