Ral ram ah Khawmi 11 an hlo
Shan ramkulh, Pinlaung peng, Namnein khawmi 11 pawl cu March 11 ihsin an hlo thok ih tu ni tiang an umnak hmun theih a si lo.
Ralhraang ralkap in Namnein khua cu March 11 ah an luhcilh ih phungki tlawng ih beutu Khawmi a rualrual in an kap that. Cutawkah phungki 3 telin Khawmi 33 an um nan ruak 22 lawng phorhsuah a si ih midang 11 pawl cu an hlo thluh tiah KNDF spokesperson Saw Tha Eh Soe (hminthleng) in Vice hnen ah a sim.
“Phungkitlawng ah mipum 33 an um ti kan thei. Asinan ruak 22 lawng kan hmu ih midang pawl khawi ah an um ti kan thei lo” tiah KNDF ṭuanvonei cun a rel ih “an nung maw an thi ti khal kan thei lo” a ti.
Saw Tha Eh Soe cun khawmi 11 pawl cu ralhraang ralkap in tumtah nei in an kai hrim mi siding a zum thu a rel ih “khat le khat remawklonak suak ter dingin le biaknak thawn pehparin mipi lakah buainak um dingin an tuah mi a si thei” a ti.
“Tuhlan ihsin khawmi a rualrual in thah an si tikah mipi ralkap an puh ṭheu. Atu ih mihlo 11 pawl khal hi an mah duh zawng thu rel ter duh ah an zuah hrim mi a si thei. Mipi ralkap lakah remawklonak suak ter an duh.”
“Pakhat a um bet mi cu atu a rualrual ih thah tuar pawl lakah Pa`O mi an tambik. Phun hnam zawngin Karenni mipi thawn remawklonak a rak um cia mi kha an ti sosa duh. Cun, phungki 3 an that telmi khal hi biaknak lam suamawknak ah an can tum ruangah a si thei. Kan nih lam ah Christian kan tam ih, Christian pawl in phungki an that ti`n thu an her kual tum.”
“A tawi zawngin rel men sehla mipi ralkap sakhaan lak dingin ralhraang ralkap rakbawm dahtu Pa-O National Army kha in huatnak luar sin dingin an taw an tok” tiah a ti.
Ralhraang ralkap in Namnein khua an luhcilh ṭum ah phungkitlawng ih relhtu khawmi pawl cu mi burbur in an ṭhen ṭhek ih phungki 3 telin a rualrual in an kap that hlei ah inn tampi an urkaang. Tu khalah Namnein khua kiangkap ah doawknak a um peh vivo ti`n thuthang kan thei.
