Mithi zo PDF hruaitui` Ruak rapthlak zetin Soisa

Ralhraang SAC ralkap sual zia cu kan thei tlangpi zo nan, tuṭum Sagaing ramṭhen ih PDF hruaitu le mipi an soisa that dan cu tuksum in a rapthlak hleice.

Ralhraang kut tuar PDF hruaitu cu Tartaing PDF hotu Ko Kyaw Zaw a si ih, ralhraang umdan a thlingthla thup lai ah an kai ngah tiah Sagaing NUG palai pakhat in a rel.

“February 28 zaan ah ralhraang ralkap pawl Tartaing khua lam an pan thu theih a si ih, cumi thlingthla dingin a va feh. Cunah an kai ngah ih nasa zetin an hrem, an that, a nung nawn lo mi a ruak khal cu rapthlak zetin an soisa” tiah a ti.

Ko Kyaw Zaw cu a Kut Ke an tan bul thluh hleiah a ril phorh sak in a Lu an tan bul mi cu a ṭang par ah an ret. Cuih zuk cu mipi le hriamkai pawl thinphang hai seh ti`n online ah mi ṭhih nakah hmangin an thlah darh bet.

Tartaing khua cu March 1 zinglam khawvang hlan ah ralhraang ralkap in an luhcilh ih khua an suah san hnu ah Ko Kyaw Zaw ruak an sar leh mi a si.

Khua an suahsan zawngah mipi tampi ralkham phaw ah hmangin an hruai cih ih cumi sung ihsin minung 14 an that tiah khuami pawl in an sim.

Ralhraang soisa thatmi khuami pawl lakah Ko Kyaw Zaw unau telin mi 5 hrawng lawng hmeltheih an um ih a dang pawl cu zo an si ti theihfaing a si lo.