Mipi ralkap in raldonak Tank fate tuah suak
Mipi ralkap hrang hmang ṭangkai zet dingih ruahmi raldonak ceet mawṭaw fate “Bot Tank Sentry” cu Karen mipi ralkap in paisa tam zet cemliam in an tuah suak thu theih a si.
Bot Tank Sentry tuahtubik mastermind cu raldo hmainor ralkap dinhmun ihsin colh la zo Ko Ukgyi a si ih atu ah fimthiamnak lam zawngin dothlengnak ah telve a si.
Amah hohanak thawn mi 5 pawl in an thiamnak hmuahhmuah suahin an tuah suak mi a si ih, a hmang dan cu mipakhat in mawṭaw fate a control dingih pakhat in meithal control dingmi a si.
Ceet mawṭaw tuah hohatu Ko Ukgyi cun “kan tuah nak san cu ralhraang do hmainortu mipi ralkap hrang ruah san in kan tuah mi a si. Ralkap ai ah himi kan thalh dingih kan ralkap thi-hlo an mal phah ding ti`n kan ruat.”
“Rampihuap dinhmun in hivek lam fimthaimnak ah kan tlasam zet in a lang ih, a tuah duh an um cun kan tuah dan kan hlawm ding. In pehtliah hmasa sehla kan nih in siang zetin kan zirh ding.”
“Tuah caan cu thla 6 hrawng rei ding. Thilri cah ah thla 4 hrawng hngah a ṭul ih cemliam cu kyat ting 35 hrawng a si” tiah a ti.
Bot Tank Sentry an hmang sin lai video cu online ah thlah darh a si ih mipi lawmh an hlawh zet a si.
