Kalay ih kah that mi ralhraang captain in US dollar a rak pai ve kher
Sagaing ramṭhen, Kalay Township, Taungta veng ih kah that mi ralhraang captain colh la zo Nguai Zin thilri an lak sak mi pawl ah US dollar telin ramdang paisa khal a tel bet.
February 13 zinglam ah lakphak dawr ihsin a tlunglam ah khuasung mipi ralkap pawl in an kap that mi a si ih a mawṭaw siseh, meithal pakhat, meithal zian le a dawng 4, kut ken bomb pakhat, ṭang khuh, turbin, capoimawh phunphun le paisa tipawl an lak sak ih cumi ah Kawlram paisa, US dollar le taluk paisa siding zum um mi pawl a tel cih.
Mipi ralkap pawl zuk pholang mi ah US dollar cu fangkhat ca si in a lang ih a uar ve hrimhrim maw, ziang hrang ah a kol timi cu felfai in theih a si lo.
Ralhraang kapthattu hi Kalay PDF kaihruainak hnuai ih um khuasung mipi ralkap Operation MoMo cangvaihnak a si ih an kap that thluh veten hmun him ah an tlan cih.
Cangvaihnak hnungzulin ralhraang ralkap lam an cangvai ve ih kahawknak kiangkap ih um le khawmi tamnawn an kai ve tiah theih a si.
Mipi ralkap kah that mi ralhraang Nguai Zin cu a taksa par ih um id ah ralkap colh la zo si in ngankhum a si nan ralhraang cozah thawn pehzom ih hnaṭuantu mithupi pakhat a si.
