Hramlak Vui sual tumpi in Khawmi pal that

Ayeyarwady ramṭhen, Thabaung peng ah hnaṭuan tum khawmmi mipa pakhat cu Vui sual tumpi in a pal that tiah theih a si.

Amah hi TawChuaiKun khawmi a si ih hnaṭuan a feh lai ah feet 8 sang hramlak vui sual in a mawng thawn a vuak tluk ih a Lu a pal beek tiah mibawm hnaṭuan pawl in an sim.

“A Lu a pal beek. A hmun rori ah a thi cih. Hih hmun kiangkap ah hivek vanduainak a um thei zet. Vui ṭhenkhat cu khua kiangkap naivai ah an tlangleng ih rinlopin khawmi pawl an hnaihnok ṭheu” tiah mibawm hnaṭuan cun a rel.

Kilkhawitu neilo hramlak Vui tampi cu ramtawi pawl ruangah Tuupi laili ah um ngam nawn loin, khua thawn a hlat tuk lo mi Tuupi kap pawl ah an thlangleng.

Rawl hawl ah an vak an tawi vivo ih Khawmi pawl awloksawng in an um. A caan le mi inn an siat sak. A caan le khawmi pawl an cilnuai ti`n amahcun a rel bet hrih.

Ralhraang ralkap in rampi ukhruai thuneihnak an la hnu ah Ayeyarwady ramṭhen ah hramlak vui that tuar an tam sawt zet hlei ah inn siat sak le Vui cilnuai tuar khawmi an pung zet ti`n report a um a si.