Bogyoke Aung San suah ni caan hmang lai ah ralthuam tum thawn an kap
February 13 zinglam nazi 10 hrawngah Sagaing ramṭhen, Myaung myone ih Bogyoke Aung San suah ni hmang lai cu Irrawaddy tipi ralkhat ihsin ralhraang ralkap in ralthuam tum thawn an kap tiah theih a si.
Myaung myone, Nyaungkaryar khua ah NUG, Education department kaihruainak thawn Bogyoke Aung San suah ni an hmang lai ah ralthuam tum thawn an kap mi a si ih khawngaw le hliam tuar cu an um lo.
Myaung Eagle PDF ṭuanvonei mipakhat in “Program hmang khawsuak lo dingin ralthuam tum thawn in kap nan tluangten kan hmang thei.”
“Caan kan hmang rero lai ah Irrawaddy tipiral, Mandalay lam ihsin in kap mi a si. Khawngaw le hriam tuar zo hman kan um lo ih hluanghlai zetin kan tuah suak” tiah a ti.
Innkhi 300 hrawng um in mipum 800 hrawng khawsanak Nyaungkaryar khua cu 2022 october thla ah ralhraang ralkap in an luhcilh dah ih cuih ṭum ah inn 21 lenglo urkaang sak an tuar a si.
